Team Rama solo leader gihapon

CEBU, Philippines - Midaug na sab ang Team Rama nga gipangulohan ni Jingjing Rama human sila makaikyas batok sa Helmet (HWT) ni businessman Allan Lim sa iskor, 100-98 kaniadtong Biyernes sa gabii alang sa ilang ika-unom nga daog sulod sa pito ka duwa ug mipahugot sa ilang liderato sa nagpadayon nga  elimination round sa AMBL Basketball Cup basketball tournament ubos sa 40-Above division didto sa Vicente Sotto Memorial Gym sa barangay Punta Princesa,ning dakbayan. 

Ang maong torneyo gipaluyohan sab sa Du Ek Sam (DES)  ug sa LG Appliance Masters.

Sikit ang duwa sa kinatibuk-ang first half  dihang igo lang naglabaw ang Team Rama og usa ka lugas gikan sa mga puntos nilang Medy Dejos ug Lito Fuentes kinsa maoy nagtimon sa mainitong opensa apan nagpunay sab og sukli ang  Helmet kinsa mao nay naglabaw pagsugod sa fourth period, 78-76 human ilang ma-outsocre ang Team Rama, 31-22  pinaagi sa rally nga gipasiugdahan nilang Robert Abasolo, Milfred Sampelo ug Lito Navarro.

Nagtabla sa makadaghang higayon didto sa fourth period og pipila ka mga lead changes ug ang kataposang deadlock nahitabo sa nahibiling 1:04 ang oras sa duwa sa iskor, 98-all apan ang kanhi UV Lancer pointguard nga si Ope Abellana nakakubit og foul ug nakapasulod sa iyang duha ka free throws nga maoy nahimong winning baskets.

Ang ex-PBA star nga si Danny Aying maoy nangu sa Team Rama sa iyang 19 puntos samtang laing upat niya ka teammates pulos sab mibahog og double figures nga silang Dejos, Abellana ug Lito Fuentes sa ilang 14 puntos matag usa.

Ang higanteng si Bonel Balingit kinsa usa sab ka kanhi player sa PBA, midugang og 12 puntos sa maong kadaugan.

Ang 3-3 nga Helmet gipangulohan nilang Sampelo ug Abasolo sa ilang 22 ug 21 puntos, matag usa ug mihimo sab og double figures silang Navarro, bull-stong center Aikan Cabañero ug kanhi USJ-R center Rey Abarquez.

Puntos matag usa:

TEAM RAMA (100)- Aying 19, Abellana 14, L. Fuentes 14, Dejos 14, Balingit 12, A. Fuentes 8, J. Rama 5, Pahamutang 5, Vidal 5, Lo. Navarro 3, Balaba 2. 

HELMET (98)- Sampelo 22, Abasolo 21, Li. Navarro 18, Abarquez 10, Cabañero 10, Panique 5, Lim 4, Arias 4, Bacalso 2, Sullano 2.