ALA boys mi-kosa mga kontra

CEBU, Philippines - Gipakita sa duha ka ALA Gym boxers nga sila si Melvin ‘Top Gun’ Gumban ug Mark Bernaldez nga sila ang mga umaabot nga world title prospects sa nasud human nila gipatumba ang tagsa-tagsa nila ka mga Indonesian nga kaatbang sa ‘IDOL’ boxing series niadtong Sabado sa gabii didto sa Escalante City Coliseum sa Negros Occidental.

Ang 23-anyos nga super flyweight nga si Gumban mipakita sa iyang kapaspas ug kusug human niya gipukan ang Indonesian nga si John Bajawa sa 2:21 sa seventh round.

Misuway pakigsinukliay og kumo si Bajawa ngadto ni Gumban, apan ang batan-ong ALA fighter mipatugpa og left hook ngadto sa apapangig sa Indonesian boxer kinsa diriyot mawad-an og panimuot.

Sa maong kadaugan si Gumban mipalambo sa iyang record ngadto sa 15-0, 7KOs, samtang si Bajawa nakahiagum sa iyang ikalimang pailde sud sa 17 ka away.

Hinuon di sama ni Gumban, si Bernaldez sayun ra nga midispatsar sa iyang kontra dihang iyang gipalup-og sa first round ang laing Indonesian nga si Marangin Marbun.

Daling gibirahan ni Bernaldez si Marbun pinaagi sa pagpatugpa og mga kumo nga gitapos niya sa usa ka bangis nga left hook sa lawas sa Indonesian kinsa wala na makabarug pa sa maong round.

Ang way pilde nga si Bernaldez mirehistro sa ikapito niyang knockout sud sa 11 ka daog, samtang si Marbun kinsa gikasangka kaniadto ni retired ALA boxer Rey ‘Boom Boom’ Bautista nakahiagum sa iyang ika-11 nga pilde sud sa 23 ka fights.

Sa supporting bout sa ALA Promotions and ABS-CBN boxing event, ang kanhi amateur standout sa Bohol nga si Jessel Mark Magsayo misakmit sa ikatulo niyang sunod-sunod nga daog pinaagi sa unanimous decision batok ni John Rey Melligen.

Mokumpleto sa lista sa mga midaog mao sila si Richard Barrios batok Ryan Canillas, Kim Galon batok Rico Eugis, Japanese Kazuma Ejiri batok Jerome Baja ug Raul Yu batok Diomedes Semella. (BANAT NEWS)