Singwangcha, Mancio pabiling hari

CEBU, Philippines - Nadepensahan nilang  Marco Demecillo-Singwangcha sa Rex 'Wakee' Salud Stable ug Jerson 'Smooth Operator' Mancio sa ALA Boxing Gym  ang  ilang tagsa-tagsa ka bakus batok sa managlahi nilang challengers niadtong Sabado sa gabii sa duha ka managlahing binyu  sa Mindanao.

 Si Singwangcha midaog pinaagi sa "unanimous decision" batok ni  kanhi undefeated Giovanni  'Little Giant'  Escaner aron magpabilin kaniya ang iyang Philippine super flyweight crown didto sa Dipolog City, Zamboanga del Norte.

 Ang 22-anyos nga si Singwangcha mipahimulos sa iyang kasinatian aron mapilde   si Escaner sa Parañaque City.

 Tulo ka mga hurado ang mihatag og 117-116, 116-114 ug 115-113 pabor ni Singwangcha.

 Sa maong kadaugan si Singwangcha nagbitbit na karon og 19-1, 14KOs, samtang si Escaner nahiagum sa labing una niyang pilde sud sa 11 ka away.

 Sa supporting main event, si Melmark Dignos sa Noy Pacing Flores Boxing Club midaog pinaagi gihapon sa "unanimous decision" batok ni Bryan Capangpangan, samtang si Carlo Demecillo mipakamang ni Juanito Tumugsok sa 2:56 sa third round.

 Si Kenny Demecillo mimakmak ni Edward Camion sa sixth round, samtang si Anthony Sabalde mipaundang ni Jeffrey Jimenez sa second round.  Gipilde sab  ni Gadwin Tubigon si Doriel Ramos pinaagi sa puntos.

 Sa laing bahin, si Mancio yano kaayong nakadepensa sa iyang Phl light flyweight crown human niya gi-knockout sa third round si Jovel Romasasa sa main event sa  "ALA-Cobra Tunay na Lakas Boxing" series didto sa Magsaysay Park sa Davao City.

 Si Mancio miinat sa iyang rekord ngadto sa 18-3, 9KOs, samtang si Romasasa nahagsa   sa 10-11, 4KOs.

 Sa undercard sa maong boxing event, si Ralph Lulu mi-TKO ni Ronerex Dalut, si Reymund Tabogon mipukan ni Engelbert Moralde, si John Vincent Moralde mikulata ni Jestoni Makiputin, si Bonjun Loperez mimakmak ni Rocky Incepido, samtang tabla ang resulta sa away nilang Jessie James Boiles ug Glendon Ramos. (BANAT NEWS)