Julaton gikulata ni Salazar
CEBU, Philippines - Nakahiagum og sakit nga kapildehan si kanhi WBO/IBA Super Bantamweight world champion Ana "The Hurricane" Julaton (12-4-1, 2 KOs) batok sa Mexican-American nga si Celina “The Professional†Salazar (5-1-2, 1 KO) pinaagi sa 10-round unanimous decision kagahapon didto sa Plaza de Toros sa Cancun, Mexico.
Sa taho sa fightnews.com, ang 33-anyos nga si Julaton pakyas pagkumbinsir sa mga hurado alang sa daog human siya gilupig sa puntos sa the rising female latin boxing prospect nga si Salazar.
Sa maong kadaugan, si Salazar nanghinaot nga makakuha og world title shot human usab siya makahiagum sa labing una niyang kapildehan sa mga kamot ni kanhi WIBA flyweight champion Melinda Cooper niadtong miaging tuig.
Gawas pa niini, milampos usab si Salazar pagpanimawos ngadto ni Julaton kinsa mipilde sa duha niya ka mga kababayan nga sila si Yolanda Segura ug Abigail Ramos.
Ang usa ka tuig nga pagkawala sa eksena sa boxing maoy usa sa gitudlong rasun sa ngil-ad nga lihok ni Julaton kinsa naglisud pakigsinukmagay sa mas paspas nga si Salazar.
Sa maong kapildehan, nahanaw ang damgo ni Julaton nga moaway pagbalik alang sa world title. Si Julaton gitakda unta nga moaway alang sa IBF title ni Mexican Yasmin Rivas sa undercard sa Floyd Mayweather Jr.-Canelo Alvarez showdown didto sa MGM Grand Garden Arena sa Septiyembre 14. (BANATSPORTS)
- Latest
