Singwangcha modepensa na sa iyang bakus
CEBU, Philippines - Garbo sa RWS stable nga si Marco Demecillo Singwangcha manalipod na sa iyang Philippine super flyweight title batok ni undefeated challenger Giovanni 'Little Giant' Escaner sa Parañaque City sa main event sa "Astig Pinoy I" didto sa Dipolog City.
Mao kini ang ikaduhang pagdepensa ni Singwangcha sa bakus nga iyang nadaog human niya gipilde ang kanhi undefeated champion nga si Marvin Mabait pinaagi sa third round knockout niadtong Abril sa miaging tuig didto sa Lapu-Lapu Shrine sa Mactan Island.
Sa iyang unang title defense lima ka bulan na ang milabay, si Singwangcha yano kaayo mimakmak ni Marvin Tabamo sa fourth round didto sa iyang yutang natawhan sa Iligan City.
Apan napilde siya sa iyang katapusang away pinaagi sa "unanimous decision" ngadto ni ALA Boxing Gym prospect Arthur Villanueva niadtong Abril 20 didto sa University of Southeastern Philippines Gymnasium sa Davao City.
Si Singwangcha adunay impresibong rekord nga 18-1, 14KOs, samtang si Escaner wala pay pilde sa iyang 10 ka away diin unom sa daog niini gikan sa knockout.
Sa laing bahin, si ALA Gym fighter Jerson 'Smooth Operator' Mancio modepensa usab sa iyang Philippine light flyweight belt batok ni Jovel Romasasa sa main event sa "ALA-Cobra Tunay na Lakas Boxing" fightcard didto sa Magsaysay Park sa Davao City.
Si Mancio nagbitbit og 17-3, 8KOs nga rekord, samtang si Romasasa adunay 10 ka daog ug 10 sab ang pilde. (BANAT PALARO)
- Latest
