Lancers nag-una, 2-0

CEBU, Philippines - Nalupig sa mga big men sa University of the Visayas (UV) Green Lancers ang ilang mga karibal dihang gidominar nilang Cameroonian import Mike Harry Nzessue ug Hernal "Wowie" Escocio ang ilawom didto sa fourth period pinaagi sa pag-iskor og mga mahinungdanon kaayong puntos aron tabangan ang ilang team sa pagkulit og 91-80 nga kadaugan batok sa kugihan kaayong University of San Jose Recoletos (USJR) Jaguars ug nag-una na karon sa ilang 2-0 nga baraha sa sayong bahin sa nagpadayong 13th season sa Cebu Schools Athletic Foundation, Inc. (CESAFI) kaniadtong Sabado sa gabii didto sa Cebu Coliseum.

Naglabaw ang Lancers atol sa halftime, 46-33 apan gibuksan sa Jaguars ang third period pinaagi sa mainitong 11-2 rally nga gipasiugdahan nilang James Regalado ug rookie Fletcher Galvez  aron mosikit ngadto na lang sa kuwatro puntos nga biya,  44-48 apan dali ra sab kaayong misukli ang Lancers kinsa mipabuhagay og 16-2 scoring run aron inaton ang ilang labaw ngadto sa 18 puntos, 64-46 sa nahibiling tres minutos sa wala pa matapos ang third quarter.

Mi-rally pag-usab ang Jaguars apan wala gihapon makurat ang Lancers aron sumpoon ang pagmangtas nilang Christian Parker, Ralph Christian Senining ug sa iyang manghod ug rookie nga si Rendell Thomas Senining diin misikit na sab ang Jaguars, 72-79 sa nahibiling singko minutos sa duwa ug wala madugay, hingpit nang gipadaplin sa Lancers ang ilang kaatbang human sa sagunson singko puntos ni Escocio, usa ka three-pointer ni Francisco Arong, Jr. ug sa monster slam ni Nzessue.

Ang tulo ka triples ni Venhur Villamor sa second half  dako sab og natabang sa kampanya sa Lancers human isya moabuno og 12 puntos apan silang Nzessue ug Escocio maoy nangu sa opensa sa ilang 18 ug 15 puntos, matag usa.

Si Galvez, ang rookie gikan sa high school champion Sabred Heart School-Ateneo de Cebu (SHS-Adc) Magis Eagles, maoy nangu sa Jaguars sa iyang 16 puntos

Samtang si Regalado midugang og 15 puntos. Miamot sab og 11 puntos si Miguel Tabaloc samtang mitikdol og 10 puntos si Rendell Senining.

Puntos matag usa:

UV (Coll.) 91—     Nzessue 18, Escocio 15, Villamor 12, Codilla 9, Abad 8, Akmomo 7, Mendoza 6, Cabañero 6, Arong 3, Octobre 2, Perolino 2.

USJR (Coll.) 80—   Galvez 16, Regalado 15, Tabaloc 11, R. Senining 10, C. Parker 9, Lajato 7, C. Senining 4, M. Parker 4, Sanchez 3, Cinco 1. Halftime: 46-33. (BANATSPORTS)