Gaisano capital south, 5-2

CEBU, Philippines - Gibaswat nilang Kido Cabrera ug Cameroonian import Arnud Noah ang Gaisano Capital South-UC kinsa daling nakarekober sa ilang pilde sa miaging gabii ug mipukan sa Raphael's Cafe-USJR, 85-72 kaniadtong Sabado atol sa nagpadayong second round of elimination of the Enervon CESAFI Partner's Cup 2013 basketball tournament didto sa Cebu Coliseum.

Mga duwa ugma: (Cebu Coliseum)

4 pm San Marino Tuna-CIT-U vs. Raphael's Cafe-USJR

5:45 pm Lion Tiger-USPF vs. Gaisano Capital South-UC

Si Cabrera kinsa wala makahuygo dihang napilde sila batok sa Cebu Landmasters niadtong Huwebes, miposa og 21 puntos diin siyam niini ang sagunson niyang gihimo pagsugod sa fourth period samtang si Noah kinsa maisogong miatake sa depensa sa Raphael's Cafe sa ilawom, midugang og 19 puntos lakip ang pipila ka three-point plays. 

Ang madaugan naghatag sa Gaisano Capital og 5-2 nga baraha aron magpabilin sa ikaduhang pwesto. 

Nakasikit pa unta ang Raphael's Cafe sa nahibiling pipila ka segundos sa third period, 51-53 apan mibahug og sagunson singko puntos si Gerald Ampoon sa Gaisano Capital aron taposon ang maong period sa ilang 58-51 nga abante.

Ang Gaisano Capital kinsa nag-igo sa ilang tirada sa fourth quarter, miposte sa ilang labing dakung labaw nga 18 puntos, 82-64 may pipila na lang ka minutos ang nahibilin sa duwa ug wala na maka-apas ang ilang kaatbang.

Epektibo ang mga jumpshots ni Cabrera ug ang mga drives ni Noah kinsa maoy nagsilbing point guard sa fourth quarter diin nakabentaha ang Gaisano tungod kay mas taas ug mas abtik si Noah.

Ang Raphael's Cafe wala pa gihapo'y daog hangtod karon sa ilang 0-6 nga baraha.  Puntos matag usa:

Gaisano Capital (85) —  Cabrera 21, Noah 17, Quintao 9, Smith 8, Ampoon 7, Alocillo 7,  Asis 6, Miranda 5, Mangyao 3, Tamparong 1, Montilla 1

Raphael's Cafe (72)—   Zosa 13, Sanchez 10, Regalado 9, C. Senining 8, Bayhonan 8, Lajato 6, Cinco 6, Diaz 4, M. Parker 2, Villarosa 2, Silay 2, Rosell 2. Halftime: 46-36.  (BANAT PALARO)