Davies Paint kampiyon sa Bosconian Alumni Cup
CEBU, Philippines - Talagsaong matang nga pangataki ang gihimo sa Davies Paint sa ulahing bahin sa duwa nga maoy ilang bugtong paglaum pagbuntog sa Bullvets, 62-55 sa ilang tinaktakay nga kampiyonato aron masakmit ang titulo sa Bosconian Basketball Club Alumni Cup 2013 didto sa Don Bosco Technology Center (DBTC) gym sa Punta Princesa, ning siyudad.
Kanhi varsity player nga si Celso Colegado maoy nag-unang scorer alang sa Davies Paint pinaagi sa iyang 15 puntos, apan mao kadto ang iyang naandan nga duwa sa kinatibuk-ang torneyo nga igo na kaayo alang kaniya aron ilhon isip most valuable player.
Ang Davies Paint nabiyaan og kuwatro puntos human sa first period, 11-15, apan mibawos pinaagi sa ilang 19-9 run sunod nga kuwarter aron moposte og sayes puntos nga bentaha, 30-24 sa halftime.
Nakatabla ang Bullvets, 44-all paghuman sa tulo ka kuwarter, apan ang Davies Paint padayong nakigbisog sa final period hangtod naangkon ang kadaugan.
Si Gunther Seroy maoy nangu sa pilderong Bullvets nga miratsada og 14 puntos.
Sa sayo pa, si Payang Alforque mikadlit og 21 puntos alang sa DBTCH '95 nga walay kukaluoy miihaw sa DB Greywolves, 65-46 aron sakmiton ang third place trophy. (BANAT PALARO)
- Latest
