Gusto ko modepensa dinhi sa Pinas – Sabillo

CEBU, Philippines -  Naglaum si interim WBO  minimumweight king Merlito 'Tiger' Sabillo sa ALA Boxing Gym nga sa Pilipinas

ipahigayon ang iyang title defense.

 Si Sabillo maoy bag-ong minimumweight champion dihang iyang gipaundang sa eight round ang Colombian nga

si Luis De La Rosa niadtong Domingo didto sa Colombia.

 "Nindot gyud unta kun anhi sa Pilipinas ko modepensa sa akong title, pero andam ko bisa'g asa depende ra

gyud nila ni sir ALA," matud pa ni Sabillo sa iyang pagbisita kagahapon sa buhatan sa The Freeman ug Banat News.

 Ang 29-anyos nga si Sabillo nagkanayon nga dili sayon ang iyang giagian aron mahimong world champion. Ilabi

na nga kadto ang iyang unang higayon nga moaway sa nasud, apan ang garbo sa Negros Occidental miingon nga nahimo

niya ang tanan tungod sa suporta ug pag-ampo sa iyang mga kababayan.

 "Layo gyud akong gibiyahe pero nagpasalamat ko kay wa gyud ko mibati og kaluya, nagpasalamat ko sa

tanang mga misuporta nako ug sa ilang mga pag-ampo mao nang milampos ko," dugang pa niya.

 Sa iyang bahin, si ALA chief trainer Edito Villamor nagtuo nga sa dili madugay, i-proklamar na nga regular

champion si Sabillo tungod kay nakita niya nga hingpit nang ibakante ni Mexican Moises Fuentes ang maong bakus.

 "Naghuwat na lang mi og pormal announcement pero tan-aw nako ibakante na ni Fuentes ang regular title kay

gusto gyud ni nga makig-rematch ni Nietes," segun pa niya.

 Si Fuentes, ang kampiyon sa 105 division mobakante sa iyang titulo kun makig-rematch kini ni WBO light

flyweight champion Donnie 'Ahas' Nietes, kinsa nagpabiling kampiyon human misangpot sa "majority draw" ang  ilang

sangka niadtong Marso 2 didto sa Waterfront Cebu City Hotel and  Casino. (BANAT NEWS)