Rockets nabaraw

CEBU, Philippines - Miantug og 18 puntos si Goran Dragic, 13 niini didto sa fourth period diin miabag kaniya ang ilang mga bench players aron baswaton ang Phoenix Suns ngadto sa 107-105 nga upset batok sa mas seeded nga Houston Rockets kagahapon didto sa US Airways Center sa Phoenix, Arizona.

Si Jared Dudley maoy nangu sa Suns sa iyang 22 puntos ug may pito ka assists gikan sa  bench aron tabangan  ang Suns nga mokulit og 22-41 nga baraha.

Ang Suns nakatigum og 55 puntos gikan sa ilang mga reserves diin mihimo'g 14 puntos ug may lima ka rebounds si Markieff Morris.

Si James Harden mibahug og 38 puntos alang sa Rockets kinsa nagkaduol na untang moilog sa pwesto sa Golden State alang sa ika-unom nga pwesto sa Western Conference ilabi na kay napilde ang Warriors sa Milwaukee Bucks, 93-103.

Si Carlos Delfino kinsa mihimo'g lima sa iyang siyam ka  three-pointers, midugang og 21 puntos alang sa Rockets kinsa naghupot karon ug 34-30 nga baraha.

Human sila makasikit, misipyat ang Rockets sa ilang lima ka sagunson nga pagsuway.

Ang basket ni Dragic sa nahibiling 45 segundos maoy naghatag sa Suns og 101-93 nga labaw apan nakahimo lang gihapon pagsikit pag-usab ang Rockets pinaagi sa mga puntos ni Harden kinsang three-point play maoy mihimo sa iskor nga 92-93 sa kataposang kuatro minutos sa duwa.

Gani, milampos pa gyud paglabaw ang Rockets ginamit ang ilang makalilisang nga outside shooting apan dali ra kaayo silang milabaw tugod kay nabawi dayon kini sa Suns human sa triple ni Michael Beasley pagkatapos sa third period, 77-76.

Sa lain pang mga duwa, gilubong sa Denver ang Minnesota, 111-88, midaug ang Memphis batok sa New Orleans, 96-85, gilubong sab sa Washington ang Charlotte, 104-87, gilampurnas sa New York ang Utah, 113-84 ug midaug ang Brooklyn batok Atlanta, 93-80.

Ang kapildehan sa Utah naghatud ngadto sa tabla sa ikawalong pwesto sa West tali sa Los Angeles Lakers sa parehong 32-31 nga win-loss records. Pareho sab silang naghupot og 16 puntos sa playoff seeding ug nagtabla sa .508 ang ilang winning percentagae.

Sa higayon ng modaug karong buntag ang Lakers didto sa Staples Center batok sa Chicago Bull;s, sila na maoy mopuli sa Jazz sa ika-walong pwesto ug ang Jazz manaug ngadto sa ika-siyam nga puwesto sa kasamtangan ning nagkaduol na nga NBA playoffs. (gikan sa NBA.com)