Kontrang Nietes kuyaw og record
CEBU, Philippines - Misamot karon kadaku ang hagit nga giatubang ni WBO light flyweight king Donnie Nietes human migawas nga mas ngilngig og record ang iyang Mexican challenger nga si Moises Fuentes lahi sa mga unang nahibaw-an.
Si Fuentes kinsa musuway pag-ilog sa titulo ni Nietes karong Marso 2 sa main event sa Pinoy Pride XVIII didto sa Waterfront Hotel, unang gikataho nga adunay record nga 16-1, 8KOs, apan migawas karon nga sayup kini tungod kay aduna kini tinuoray nga record nga 26-1, 20KOs.
Ang Team Fuentes miabot niadtong Sabado dinhi sa Sugbo diin gitug-an sa manager niini nga si Jorge Barrera nga sayup ang record nga gibutang sa boxrec.com sa iyang boksidor.
Ang kanhi WBO minimumweight champion nga si Fuentes misikat human sa fifth round TKO niini nga kadaugan batok ni Puerto Rican legend Ivan Calderon niadtong Oktubre 6.
Hinuon sa pakighinabi sa Philboxing.com, si ALA Promotions CEO Michael Aldeguer miingon nga wala kini isipa nga dakung suliran ni ALA boxing gym superstar nga si Nietes (31-1, 17KOs) tungod usab kay nangandam kini og husto alang sa maong away.
- Latest
