DB-Alumni misakmit sa men's open title
CEBU, Philippines - Gipakuratan sa Don Bosco Technology Center-Alumni ang mas inilog nga BRO-ERCO FC human midaog pinaagi sa penalty shootout, 3-1 aron langkaton ang korona sa men's open sa 10th Thirsty Cup football festival sa miaging gabii didto sa Cebu City Sports Center (CCSC).
Usa kadto ka dakung kadaugan alang sa Don Bosco-Alumni gumikan kay ang BRO-ERCO gibidahan og duha ka sakop sa Philippine Azkals nga sila si Chiffy Caligdong ug Ian Araneta.
Si Warloo Sabella maoy unang mihatag og goal sa Don Bosco atol sa shootout, apan mibawos sab dayon si Araneta aron magtabla ang iskor, 1-1.
Wala magdugay, si Bong Aller milansang sa iyang go-ahead goal alang sa Don Bosco, 2-1. Nasundan kini ni Richard Canedo nga maoy mitagbaw sa ilang kauhaw sa korona.
Sa women's final, ang DBTC pakyas paghimo og doble kadaugan human sila miyukbo ngadto sa bisitang Kachella FC sa Dumaguete City, 0-2.
Apan bisan pa niana, ang DBTC mao gihapon ang labing daghang titulo nga nahipos niining tinuig nga kompetisyon nga gipaluyohan sa Thirsty Juices and Shakes.
Ang DBTC naghari sab sa players 6, boys 12 ug boys 17 categories.
Lain pang nidaog mao ang University of San Carlos-Green (girls 19), Hiroshi FC (men’s 42), ANS-Pomeroy (boys 19), Little Azkals (boys 14), San Carlos City (girls 14), ERCO-B (men’s 36), ug Sacred Heart School-Ateneo de Cebu (girls 17). (BANAT SPORTS)
- Latest
