L.A. Lakers mipukan sa Hornets

CEBU, Philippines - Bisa'g dili kaayo siya epektibo sa free throw, si Dwight Howard mihagdaw  gihapon og 24 puntos, samtang si

Kobe Bryant mihimo'g double-double sa iyang 14 puntos ug 11 ka assists alang sa  Los Angeles Lakers nga mibanlas sa

New Orleans Hornets, 111-106 sa ilang duwa kagahapon didto sa Staples Center sa Los Angeles, California.

 Si Earl Clark mihakot  og  20 puntos ug milangkat og 12 ka rebounds.

 Ang Lakers naglabaw og 18 puntos, apan gihinay-hinay kini'g kitkit sa Hornets, kinsa misikit sa iskor, 101-102

 sa nahabiling dos minutos sa duwa.  Si Eric Gordon, kinsa mihimo’g 18 puntos sa first half, maoy nangu sa

Hornets pinaagi sa iyang 25 puntos, samtang si Greivis Vasquez miamot og 15 puntos ug 15 usab ka assists.

 Tungod sa maong kadaugan, ang Lakers mikatkat na ngadto sa ika-10 nga puwesto  sa Western Conference.

   Didto sa Rose Garden sa Portland, Oregon, nakapasulod og buzzer-beater  turn-around shot si LaMarcus

Aldridge aron baswaton ang TrailBlazers ngadto sa 106-104 nga kadaugan batok sa Dallas Mavericks.

 Ang Blazers mi-rally gikan sa 21 puntos nga biya didto sa third quarter.

  Si Aldridge miposa og 29 puntos uban sa iyang 13 ka rebounds alang sa Portland, kinsa naggukod,

94-101 sa nahabiling 2:18 sa duwa.

   Si J.J. Hickson mihimo'g  season-high 26 puntos ug milangkat og 15 ka rebounds.

 Ang duha ka free throws ni Wesley Matthews maoy mipasikit sa Blazers,  98-101 sa katapusang 52 segundos

ug gitabla kini ni Nicolas Batum pinaagi sa iyang three-pointer.

 Mitira si Dirk Nowitzki og tres, apan gitubag sab dayon kini ni Aldridge aron tablahon ang iskor, 104-all  sa

nahabiling 4.9 segundos sa duwa.

       Ang buzzer-beater ni Aldridge maoy miselyo  sa ilang kadaugan.

 Si Nowitzki maoy nangu sa pilderong Mavs sa iyang 26 puntos.

 Sa laing mga duwa, ang Milwaukee Bucks milubong sa  Detroit, 117-90 ug  Golden State Warriors mipukan

sa Cleveland Cavaliers sa iskor nga 108-95. (BANAT NEWS)