Gilas moduwa sa Hong Kong

CEBU, Philippines - Mibiyahe na paingun ngadto sa Hong Kong ang mga Smart Gilas Pilipinas aron musalmot og laing international invitational tournament nga sugdan ugmang adlawa.

Kini ang ikaduhang international tournament nga salmutan sa Smart Gilas human sa Dubai International tournament diin nakahimo sila pag-abante sa quarterfinals.

Gipangulohan ni Smart Gilas coach Chot Reyes, ang mga sakop sa Smart Gilas nga moduwa sa Hong Kong naglakip nila ni Marcus Douthit, Garvo Lanete, Greg Slaughter, RR Garcia, Kevin Alas, Ronald Pascual, Jake Pascual, Matt Ganuelas ug Justin Melton.

Walay seguro kun makauban ba sa koponan ang 6-foot-9 Fil-Am nga si Isaac Holstein kinsa mouli una sa Estados Unidos tungod sa personal nga rasun, samtang ang tulo ka PBA players nga sila si KG Canalete, Ronjay Buenafe ug JayR Reyes mibalik na uban sa ilang tagsa-tagsa ka PBA teams.

Hinuon si Smart Gilas operations chief Butch Antonio miingon nga bisan pa og mga batan-on ang ilang ipada sa Hong Kong torneyo, makahatag gihapon kini og nindot nga epekto sa national team tungod kay mabaid ang mga cadet players sa koponan.

"Since it's just a training tourney, we decided to make the most of it to train our young players," matud pa ni Antonio sa The Philippine Star.

Mga koponan nga sangkaon sa Smart Gilas sa maong torneyo naglakip sa host team Hong Kong, Chinese teams, Thailand, Malaysia ug Indonesia. (FREEMAN)