ARN Builders misakmit sa korona

CEBU, Philippines -  Milampos ang ARN Builders ni playing coach Boy Te sa pagdepensa sa ilang korona human nila gilubong ang Cebu Vendors Credit Cooperative (CVCCO), 88-75 sa Guadalupe Athletics Association (GAA) 2012 Christmas basketball tournament niadtong Domingo didto sa  Guadalupe Sports Complex.

 Ang maong kadaugan   nahimo sab birthday gift ngadto kang Guadalupe Brgy. Capt. Michael Gacasan, kinsa nagsaulog sa iyang adlaw’ng kasumaran niadtong Enero 13.

 Kanhi tirador sa SWU Cobras nga si Rey Potot maoy nangu sa ARN sa iyang 13 puntos, samtang si Velben Jimenez midugang og 12 puntos.

 Ang mga krusyal kaayong puntos ni  Adot Gacasan sa ulahing bahin sa duwa, nakatabang sab og daku sa ilang opensa.

 Ang CVCCO gipangulohan ni Erwin Ferrer,  kinsa mihakot sab og 13 puntos, gisundan nilang Ed Pajuay ug Tim Dinampo nga adunay 12 puntos matag usa.

 Ang MVP nga si Potot mao usab ang nangu sa Mythical Five uban nilang  Reyes, Alex Cainglet, Ferrer ug Bags Minoza. Si Pajuay maoy misakmit sa Sportsmanship award.

 Sa sayo pa, ang Evan Aulga Hardware ni skipper Raul 'Aulga' Sollano milubong sab sa Gigi Catering sa iskor nga 96-73 aron sakmiton ang ikatulong puwesto.

 Sa laing bahin, ang GAA  Sinulog Cup 2013 gikatakdang buksan karong Enero 27.

PUNTOS MATAG USA

 ARN BUILDERS (88) -   Potot 13, Jimenez 12, Gacasan 12, Reyes 10, B. Gacasan 9, Ragasajo 8, T.

Escuyos 6, Posadas 5, Nevets  4, R. Escuyos 4, Te 3, Enriquez 2

  CVCCO (75) - Ferrer 13, Dinampo 12, Pajuay 12, Alesna 8, Abellana 7, Nacua 4, Lawas 4, Br. Miñoza 4,

Mabatid 2, Bg. Miñoza 2, Nabua 2, Francisco 2, Genon 2, Adolfo 1   (BANAT SPORTS)