Azkals hamagon karon sa Lions

CEBU, Philippines - Pahimuslan karon sa Phl Azkals ang ilang balwarte aron modaog sa Game-1 sa ilang semifinals match sa 2012 AFF Suzuki Cup batok sa Singapore Lions karong alas-8 sa gabii didto sa Rizal Memorial Stadium.

Ang Azkals mosuway pagdaog sa ilang unang duwa  sa dili pa sila mosulong sa teritoryo sa Lions sa Disyembre 12.

Bitbit ang 2-1 nga baraha sa eliminasyon didto sa Thailand, ang Azkals maninguha nga mohimo og impresibong daog batok sa Lions aron mopasilong sa finals.

Sa ilang bahin, ang Lions nga miabot kagahapon    kompiyansa gihapon  nga makahimo og "upset" batok sa Azkals bisan pa'g kaduha na sila  matiklo sa duha ka friendly games.

Ang Lions bidahan sa ilang team captain nga si Shahril Ishak, ang kasamtangang scoring leader sa torneyo sa iyang upat ka goals, anaa usab ang ilang naturalized striker nga si Aleksander Duric.

Ang Azkals ni German coach Hans Michael Weiss bidahan gihapon ni Fil-British striker Phil Younghusband uban nilang Chieffy Caligdong, Angel Guirado ug goalkeeper nga si Ed Sacapano.  (BANAT SPORTS)