Kompleto na team semis sa CIPU caging

CEBU, Philippines -  Gilubong sa FYA-Martinez Brokers ang kanhi solo leader Canillas Customs Brokerage-AME Transport, 94-78 aron hingpit nga makompleto ang semifinals sa 1st Cebu International Port Users (CIPU) basketball tournament didto sa Basak San Nicolas gym, ning dakbayan.

Nag-aso nga fastbreak points ang gihimo sa FYA aron pagpukan sa CCB nga gipangulohan ni kanhi UC Webmasters guard Kenneth Kern Sesante, kinsa miiskor og 13 puntos.

Silang Noel Medalle ug Tata Laborte maoy nangu sa FYA sa ilang 21 puntos matag usa.

Tungod sa kadaugan sa FYA-Martinez, kalit nahimong non-bearing game ang 113-97 nga daog sa Kentkyle Cuisine batok sa Alin Brokers  tungod kay nakamugna kini’g 3-3 tie tali sa Avenido Brokers.

Midaog ang Avenido sa ilang sangka batok sa Kentkyle ug tungod niini, sila maoy nakakuha sa katapusang  luna sa semifinals uban ang no. 1 Cebu Basketball Mania Association (CEBAMA) Ball Club, no. 2 nga FYA-Martinez ug no. 3 CCB Brokers.

Sa laing bahin, silang Ramil Aninon ug Kenneth Maningo nagkumboya og 43 puntos alang sa Kentkyle.

Ang semifinals himuon sa Disyembre 3 diha sa Cebu Coliseum.

Unang magsangka ang CEBAMA batok sa Avenido ug sundan sa duwa tali sa FYA-Martinez batok sa CCB.

PUNTOS MATAG USA

Unang duwa:

FYA-Martinez (94) - N. Medalle 21, Laborte 21, Abellana 19, B. Medalle 9, Marata 6, Cal 4, Pacubas 4, Gornez 4, Navaja 4, Bongon 2

CCB (78) - Yap 14, Sesante 13, Piape 12, Villa 10, Belarmino 8, Manlosa 7, Dela Cerna 5, Embrado 4, Largosa 3, Sigue 2

Ikaduhang duwa:

Kentkyle (113) - Aninon 23, Maningo 20, Gayo 19, Bensi 16, Canal 10, Solidarios 8, Real 6, Camay 6, Diaz 5

Alin Brokers (97) - Alin 20, Lobitana 18, Baral 17, Villomo 15, Estorgio 13, Lleve 12, Baltonado 2 (BANAT SPORTS)