CEBU, Philippines - Human mahapsay ang detalye sa iyang world title fight batok ni IBF lightweight champion Miguel Vasquez, way puas karon ang preparasyon ni undefeated Cebuano fighter Mercito ‘No Mercy’ Gesta kinsa makig-spar usab sa kanhi Puerto Rican world champion Miguel Cotto.
Sa taho sa Philboxing.com, si Gesta kinsa moaway sa undercard sa Manny Pacquiao-Juan Manuel Marquez showdown sa Disyembre 8 didto sa MGM Arena sa Las Vegas, mopahigayun og training camp didto sa nabantog nga Big Bear Gym sa California.
Ang Big Bear Gym usa sa labing sikat nga boxing gym sa kalibutan diin lakip sa nag-training didto mao si Miguel Cotto kinsa gusto nga himuon nga sparmate si Gesta.
Sama ni Gesta, si Cotto aduna usab giatubang nga world title fight sa Disyembre batok ni light middleweight champion Austin Trout didto sa Madison Square Garden sa New York.
"Miguel Cotto is in Big Bear too. His team asked for Mercito to spar with him in preparation versus Austin Trout," matud pa sa kampo ni Gesta.
Ang lumad nga taga-Brgy.Labogon, Mandaue City adunay rekord nga 26-0, 14 KOs, samtang si Vasquez kinsa miisip sa Sugbuanon boksidor nga usa ka lisud nga challenger adunay rekord nga 32-3, 13KOs. (BANAT NEWS)