Gesta andam batok Vasquez
CEBU, Philippines - Bisan pa og gidungog pa lang ang maong sangka, si undefeated Filipino boxing prospect Mercito Gesta andam na nga makigsangka alang sa world title sa undercard sa Manny Pacquiao-Juan Manuel Marquez IV showdown sa Disyembre 8 didto sa MGM Arena sa Las Vegas.
Sa taho sa RingTV.com, hapit na mahuman ang negosasyon alang sa world title fight ni Gesta diin siya maoy challenger alang sa IBF lightweight title nga kasamtangang gihuptan ni Mexican Miguel Vasquez.
Ang trainer ug manager ni Gesta nga si Vince Parra nagkanayon nga dugay nang gipaabot ni Gesta ang maong kahigayunan ug way undang kini sa training alang sa kahigayunan nga mahimong world champion.
"We love the challenge Vazquez presents," matud pa ni Parra. "Mercito will be well prepared for this fight. We will make him pay for every mistake."
Ang garbo sa Brgy.Pagsabungan, Mandaue nga si Gesta adunay record nga 26-0, 14KOs, samtang ang defending champion nga si Vasquez kinsa bag-o lang milampos pagdepensa sa iyang bakus niadtong Domingo batok ni Marvin Quintero adunay record nga 32-3, 13KOs. (BANAT SPORTS)
- Latest
