MBD Law Office nagsolo sa FYA

CEBU, Philippines - Nagkinahanglan lang sa eksplosibong matang sa duwa ni kanhi UC Webmasters Dandan Enriquez ang MBD Law Office aron maka-eskapo batok sa Vanese Justine sa overtime, 91-89 ug ingon man magsolo sa liderato sa F. Llamas Youth Association (FYA) basketball tournament niadtong Miyerkules sa gabii didto sa barangay Tisa gym, ning siyudad.

Sa sayo pa, ang Benedict mipilde sa Tupas Bicycle Parts, 101-91 aron magpabiling buhi sa ilang kampanya alang sa semifinals.

Si Enriquez maoy topscorer sa MBD nga miani og 23 puntos. Sila si Ahlmark Albarracin ug Baeng Medalle mipupo og 16 puntos matag usa, samtang silang Junrey Arreglo ug Isyot Regudo nagkumboya og 27 puntos alang sa MBD nga nagbitbit og 5-1 nga baraha.

 Ang Vanese Justin kinsa mitapos sa elimination round uban ang 5-3 nga baraha, gipangulohan ni Duke Teves pinaagi sab sa iyang 23 puntos, gisundan ni Chissar Llegunas nga adunay 16 puntos ug Andrew Pacubas nga miamot og 14 puntos.

Sa laing bahin, si Ranel Patalita mikadlit og 29 puntos aron pangulohan ang Benedict pagposte sa ilang 3-4 nga baraha.

Si Michael Garcia mihakot og 16 puntos, samtang silang Toper Marata ug Ryan Dacayana mitampo og 14 puntos matag usa.

Ang Tupas Bicycle Parts kinsa wala pa gyud makatilaw og daog sud sa pito ka duwa, gipangulohan ni Pangkoy Paracuelles sa iyang game-high 39 puntos, gisundan ni Tope Lavandero nga adunay 25 puntos.

Puntos Matag Usa

Unang duwa:

Benedict (101) - Patalita 29, Garcia 16, Marata 14, Dacayana 14, Anasco 7, C. Abella 6, P. Abella 4, Malicay 2

Tupas Bicycle Parts (91) - Paracuelles 39, Lavandero 25, J. Paraceulles 11, Alguirre 6, Lim 4

Ikaduhang duwa:

MBD Law Office (91) - Enriquez 23, Albarracin 16, B. Medalle 16, Arreglo 15, Regudo 12, Sarsaba 4, Parba 3, Abella 2

Vanese Justine (89) - Teves 23, C. Llegunas 16, Pacubas 14, Jakosalem 12, Sydiongco 11, J. Llegunas 7, Villordon 4, Pacana 2  (BANAT NEWS)