MBD midaug batok Simple Likes

 CEBU, Philippines - Mikadlit og 30 puntos ang kanhi-UC Webmaster nga Dandan Enriquez aron pangulohan ang MBD Law Office ngadto sa kulbahinam nga 104-101 nga kadaugan batok sa Simple Likes Barbecue Haus kaniadtong Biyernes sa gabii sa bugtong duwa sa nagpadayong F. Llamas Youth Association (FYA) basketball tournament didto sa barangay Tisa gym, ning dakbayan.

Ang MBD Law Office naghupot na karon og 4-1 nga baraha ug nagtinguhang sakmiton ang no. 1 spot sa elimination ilabi na gyud kung ilang maharus ang nahibilin nilang tulo ka duwa.

 Sila sab karon ang nahimong hulga ug babag sa top contender Vanese Justine kinsa adunay 5-2 nga baraha ug aduna na la'y usa ka duwa aron pagbuhi sa ilang paglaum nga molandig sa labing menos no. 2 spot samtang ang Evoo Resto Bar nag-anam na og dailos sa ilang 4-3 nga baraha ug posibleng adto na mahimutang sa ikatulong pwesto. Ang top four teams human sa elimination awtomatik maghupot og twice-to-beat incentive ngadto na sa semifinals ug bisan pa sa ilang kapildehan, duna pa gihapo'y dako'g tsansa ang Simple Likes nga makatungtong sa ika-upat nga pwesto human ilang gitapos ang elimination sa 4-4 nga baraha.

Biya lang unta'g usa ka palito ang Simple Likes ug may higayon pang modaug sa nahibiling 17 segundos, 101-102 apan naka-iskor og insurance basket si Ahlmark Albarracin aron baswaton ang MBD.

Ang ex-USJR Baby Jaguars point guard nga si Baeng Medalle misakmit og 17 puntos alang sa MBD samtang miamot og 15 ug 14 puntos silang Tata Laborte ug Isyot Regudo.

Si Junrey Arreglo miposa og 12 puntos samtang midugang og 10 puntos si Albarracin lakip ang insurance basket alang sa MBD.

Si Ryan Villaver maoy nangu sa Simple Likes sa iyang 28 puntos ug midugang si Lito Mirasol  og 21 puntos.Laing tulo ka teammates ---Wako Dacayana, Noel Medalle ug Berto Codilla pulos miamot og double figures.

Ang FYA tournament  gidumala ni Punta Princesa barangay councilor Boy Atillo ug gisuportahan ni  Eddie Cabulao, ang kanhi barangay kapitan sa Tisa.

Puntos matag usa:

MBD Law Office (104)--- Enriquez 30, Medalle 17, Laborte 15, Regudo 14, Arreglo 12, Albarracin 10, Antiporda 3, Abella 3

Simple Likes (101)---   Villaver 28, Mirasol 21, Dacayana 14, Medalle 13, Codilla 10, Masongsong 9, Dumaguit 6, Trinidad 2