ALA Boys public workout sa SM-Cebu karong hapon

CEBU, Philippines - Mohimo na sab og public workout ang mga protagonista sa ALA Gym nga moaway sa Pinoy Pride XV: Philippines vs. Mexico The Rematch.

Human sa SM-Consolacion, si light welterweight prospect Jason 'El Niño' Pagara, Genesis 'Azukal' Servania ug Jimrex 'Executioner' Jaca mopakita sa ilang kaandam alang sa boxing extravaganza karong alas-5 sa hapon diha sa Event Centre sa SM City-Cebu 

Si Pagara makig-rematch ni Mexican Rosbel Montoya alang sa bakanteng WBO International light welterweight title karong Agosto 18 diha sa Waterfront Cebu City Hotel and Casino.

Ang undefeated nga si Servania nga bag-o lang midaog batok ni Genaro Garcia niadtong Hunyo didto sa Resort’s World Manila, makigbinukbukay sa Mehikanong si Jorge Pazos, samtang ang beteranong si Jaca mohimo sa iyang comeback fight batok sa laing Mehikano nga si Angel Martinez.

Gawas sa kahigayonan nga makakita sa ilang mga idolo, makahigayon usab ang mga boxing fans nga modaog og libreng tiket atol sa ipahigayong Pinoy Pride XV trivia contests.   - BANAT NEWS