NLEX sa finals, Big Chill humirit pa
MANILA, Philippines – Umarangkada ang laro ng NLEX sa huling yugto upang makapasok na sa finals sa PBA D-League Foundation Cup sa pamamagitan ng 82-72 tagumpay sa Blackwater Sports sa semifinals kahapon sa San Juan Gym.
Isang puntos lamang ang ibinigay Road Warriors ang Elite sa unang anim na minuto ng fourth period upang lumayo sa 75-59 at kumpletuhin ang 2-0 sweep sa kanilang best of three series.
“Maganda ang depensa sa second half. Pero taas noo kami sa Blackwater dahil kinailangan naming magtrabaho para makapasok sa finals,” wika ni NLEX coach Boyet Fernandez na nasa finals sa ikatlong sunod na conference.
Samantala, bumangon si Alex Mallari mula sa masamang ipinakita sa unang tagisan upang pangunahan ang mainit na laro ng Big Chill tungo sa 111-70 pagdurog sa Cebuana Lhuillier sa ikalawang laro.
Nagtala lamang ng tatlong puntos bago napatalsik sa laro dala ng dalawang technical fouls, si Mallari ay gumawa ng 20 puntos habang apat na iba pang kasamahan ay naghatid ng mahigit na 11 puntos upang itabla ang best of three series sa 1-1.
- Latest
- Trending