Patriots babalik sa porma
MANILA, Philippines - Painitin ang tila nanlalamig na kampanya ang balak gawin ng AirAsia Philippine Patriots sa pagharap sa Jobstreet.com Singapore Slingers sa 3rd AirAsia ASEAN Basketball League (ABL) ngayon sa Ynares Sports Arena sa Pasig City.
May 14-5 karta ang Patriots pero laglag sila sa tatlo sa huling apat na laro upang tapusin na rin ang paghahabol para sa mahalagang number one seeding sa Playoffs na tangan na ng San Miguel Beer.
Sa ganap na alas-6 ng gabi itinakda ang bakbakang handog ng PG Flex Linoleum at nananalig si Patriots coach Glen Capacio na babalik ang dating tikas ng koponan upang gumanda uli ang takbo ng team papasok sa Playoffs.
Ang koponang tatapos sa number three matapos ang triple round elimination ang siyang kalaban ng Patriots sa best-of-three series at kahit may homecourt advantage ang koponang pag-aari nina Mikee Romero ng Harbour Centre at Tony Boy Cojuangco, dapat ay magkaroon din sila ng winning momentum upang tapatan ang tiyak na inspiradong laro ng makakatunggali.
Yumukod ang Patriots sa Westports Malaysia Dragons sa huling laro na ginawa sa Ynares sa masakit na 93-97 overtime pagkatalo pero kumbinsido si Capacio na babangon ang kanyang mga alipores.
- Latest
- Trending