Patriots babalik sa porma vs Indons

MANILA, Philippines - Magpapatatag pa sa kanilang puwesto sa itaas ng standings ang Air­Asia Philippine Patriots at San Miguel Beeermen sa pag­ha­rap nila sa magkahiwalay na laro sa 3rd AirAsia ASEAN Basketball League (ABL) ngayong gabi.

Nasa The Mahara Squa­re sa Jakarta ang Patriots para sagupain ang Indonesia Warriors sa alas-6 ng gabi habang ang Beermen ay nasa Ynares Sports Arena sa Pasig City sa ikalawang pagtutuos nila ng nagdedepensang Chang Thailand Slammers sa ganito ring oras.

Hanap ng koponang pag-aari nina Mikee Romero ng Harbour Centre at Tony Boy Cojuangco na makabangon matapos ang 66-68 kabiguan sa laro nila ng Beermen noong na­karaang Linggo para magwakas ang anim na sunod na panalo.

May 7-2 baraha ang Patriots at kailangan nilang manalo para mapanati­ling hawak ang liderato sa walong koponang liga.

 Tinalo ng Patriots ang Warriors sa unang pagtutuos, 86-73.

Itataya naman ng Beermen ang kanilang two-game winning streak sa pagbangga uli sa Slammers na kanila nang hiniya sa unang bakbakan, 68-59.