Blessel naka-eskapo batok Mawin's

CEBU, Philippines - Gibaraw sa Blessel Enterprises ni Edgar Camota ang upat ka sagunson nga daog sa solo leader Mawin’s Kitchen human maka-eskapo gikan sa kulbahinam nga duwa, 92-90 sa MKBC-2012 1st Conference basketball tournament didto sa Vicente Sotto Memorial gym sa barangay Punta Princesa, ning dakbayan.

Sa kasamtangan, ang Blessel mao na lang bugtong team nga wala makatilaw og pilde sa ilang 3-0 nga baraha, samtang ang Mawin’s Kitchen adunay 4-1 nga baraha.

Kanunay naglabaw ang Mawin’s sulod sa duha ka kuwarter ug miposte’g 76-69 nga abante pagsugod sa fourth period sa kombinasyon nilang Oliver Sanoy ug Opie Abellana.

Hinuon, kalit lang nagmangtas ang Blessel sa fourth period pinaagi sa init kaayong tandem nilang Kelvin

Cinco ug Glen Cabiluna nga maoy mipasiugda sa krusyal kaayong rally diin ilang na-outscore ang Mawin’s, 23-14 ginamit ang pipila ka three-pointers aron molampos sa ilang tinguha pagkulit og laing daog.

May higayon pa untang modaog ang Mawin’s sa nahabiling otso segundos, apan misipyat sa iyang tirada si Airland Tulda gikan sa three-point area.

Si Cinco miposa'g 21 puntos   aron pangulohan ang Blessel, samtang si Cabiluna

midugang og 14 puntos.

Silang Sanoy ug Abellana maoy nangu sa Mawin’s nga nagkumboya og 35 puntos.

Sa sayo pa, ang Radisson Blu Hotel mipukan sa Metro Bank, 77-66 alang sa ilang unang daog sulod sa tulo ka duwa.

Si Mark Apepe maoy nangu sa Radisson Blu sa iyang 14 puntos, gisundan ni Van Gubat nga adunay 13 puntos.

Sila si Erwin Racho ug Lito Ocampo parehong miposa og 15 puntos alang sa Metrobank.

Puntos Matag Usa

BLESSEL (92) - Cinco 21, Cabiluna 14, Pardenilla 13, Lu 12,

Cabañero 8, Ortiz 8, Mansubre 7, Jumamel 4, Garcia 3, Arias 2

MAWIN’S (90) - Sanoy 20, Abellana 15, Tulda 11, Paguntalan 10, Sh. Lequit 10,

Taborada 6, Adriatico 4, Vallejo 4, Pagasian 4, St. Lequit 2, Sepulveda 2, Tabura 2

Ikaduhang duwa:

RADISSON (77) - Apepe 14, Gubat 13, Gonzales 12, Muñez 11, Santiago 8, Floro 7,

Quijada 6, Alima 6

METROBANK (66) - Racho 15, Ocampo 15, Rallos 14,

Borinaga 14, Mangyao 4, Verano 2, Miñoza 2 (BANAT NEWS)