Legends kampiyon na sa YUCBO caging

CEBU, Philippines - Mipabuhagay og 24 puntos si Sam Jordan Hermosa alang sa Legends nga nakalingkawas gikan sa kulbahinam nga duwa batok sa As-Es Sportswear, 70-66 ug aron usab pagsakmit sa kampiyonato sa Young Urban Community Basketball Organization (YUCBO) Sinulog Cup basketball tournament didto sa Benjamin Solon Memorial Sports Complex sa barangay Cogon-Ramos, ning siyudad.

Sa sayo pa, ang Radisson Blu Hotel mipukan sa Youth Club, 86-79 aron mopahiluna sa ikatulong puwesto.

Si Hermosa, kinsa niduwa sa University of San Carlos (USC) Warriors sa CESAFI, giabagan sab ni MVP Regino Potencioso ug Alfred Vitag nga mitimbre og 13 puntos matag usa.

Ang Legends miaksiyon og takilid human miposte og 66-54 nga bentaha sa nahabiling kuwatro minutos sa duwa dihang ang As-Es Sportswear ni team owner ug Adlaon Brgy. Capt. Elvis Narra milusad og 10-0 run aron pahakan ang labaw, 64-66 sa katapusang 1:21 sa duwa. Apan didto ra kutob ang maayong labok sa As-Es Sportswear kay ang Legends misukli og mga puntos aron molansang og kuwatro puntos nga kadaugan.

Si Randyl Roncal maoy nangu sa As-Es Sportswear nga mipabuto og 22 puntos, gisundan nilang Mark Galo ug Rigor Ramos nga adunay tag-10 puntos matag usa.

PUNTOS MATAG USA

Unang duwa:

(For third)

Radisson Blu (86) - Gonzales 28, Gubat 11, Tamparong 10, Quijada 8, Cabaluna 8, Apere 7, Nacorda 6, Manlunas 5, Lasala 4

Youth Club (79) - Iso 22, Edaño 20, Magallon 17, Fuentes 6, Ylaya 3, Tecson 3, Barrita 2

Ikaduhang duwa:

(Championship)

Legends (70) - Hermosa 24, Potencioso 13, Vitag 13, Gallarde 8, Cadilla 5, Dela Rama 4, Batiancela 2, Panerio 1

As-Es SportsWear (66) – Roncal 22, Galo 10, Ramos 10, Sonsona 8, Magat 8, Ylaya 3, Matias 3, Sotelo 2 (BANAT SPORTS)