Mayor Rama miposa'g 22

CEBU, Philippines - Miposa og 22 puntos ang basketball-playing mayor nga si Michael L. Rama lakip ang usa ka buzzer-beating ug insurance three-pointer aron pangulohan ang RC Goldline My Phone sa pagkulit og kulba-hinam nga 109-105 nga kadaugan batok sa Blessel quintet ubos ni Stevenson Dajalos sa nagpadayong Jun Pe’s Cup sa miaging weekend didto sa UBCA hardcourt sa barangay Quiot, ning dakbayan.

Ang team ni Mayor Rama nga RC Goldline may usa ka palito nga labaw, 106-105 sa daginutong oras ug may higayon pa ang Blessel pagkulit og come-from-behind nga kadaugan apan misipyat sila sa ilang kataposang tirada ug sa ilang posesssion, didto nagpa-abot si Mayor Rama sa iyang paboritong pwesto dapit sa tuong bahin sa three-point arc diin nakapasulod siya’g krusyal nga three-pointer.

Gawas kang Mayor Rama, ang iyang mga kauban nga nakatabang og daku sa opensa mao si Danny Aying kinsa mibahug ug 14 puntos ug silang ex-Lancer Rene Toring ug Glenn Birao kinsa midugang og 14 ug 10 puntos, matag usa.

Ang playing coach sa RC Goldline nga si Charlie Reyes miabuno sab og 10 puntos sa ilang kadaugan.

Ang RC Goldline maoy paborito alang sa korona tungod kay kadaghanan sa ilang mga players mga kanhi collegiate varsities.

Puntos matag usa:

RC Goldline (109) — Rama 22, Aying 14, Toring 12, Birao 10, Reyes 10, Y. Alesna 8, Navarro 8, Diaz 4, Jueves 4, Sanchez 4, R. Alesna 2

Blessel (105) — Carpio 31, Ferrer 20, Dajalos 19, Astudillo 15, Camoto 8, Ortiz 8.  - BANAT NEWS