Missos hari sa 6th Seminary Fun Run
CEBU, Philippines - Nahimo na nga regular winner sa mga fun run sa Cebu ang Kenyan nga si Abraham Missos dihang midaog na sab kini sa 6th Seminary Fun Run niadtong Domingo didto sa Seminario Mayor de Cebu sa Mabolo, ning siyudad.
Naghari si Missos sa 15K premier division human niya gitapos ang lumba sud lang sa 50 minutos ug 48.72 segundos. Nagsunod si Joebert Carolino sa oras nga 51:55.89, samtang si Joel Delposo mipahiluna sa ikatulong dapit nga mi-oras og 52:42.58.
Sa laing bahin, ang beteranang si Christy Sevilleno-Tutor mao sab ang nanghawod sa 15K run sa oras nga 1:04.56. Sila si Madelyn Carter (1:06.06) ug Joeyry Lee (1:07.389) mao ang miangkon sa ikaduha ug ikatulong dapit.
Gawas sa mga elite runners, mipakita usab sa ilang kapaspas ang mga kaparian, kawani sa MEPZ ug mga sakop sa media.
Si Rev. Fr. James Escaro maoy nag-una sa 15K Priest category sa oras nga 1:23.11, samtang sila si Richard Abejo (1:13.910) ug ABS-CBN veteran reporter Vilma Andales (1:51.17) ang midominar sa 15K media class.
Sila si Emily Rosas ug Jeiter Bada maoy nidominar sa 6K MEPZ employee category. (BANAT SPORTS)
- Latest
- Trending
