Sonsona midominar batok ni Jacobo

CEBU, Philippines - Gipamatud-an ni kanhi WBO super flyweight champion Marvin “Marvelous” Sonsona nga andam na siya nga ibalik ang nawala niyang dungog isip usa sa mga Filipino boxing champion dihang iyang gidominaran ang Mehikanong si Carlos “El Relampago” Jacobo sa miaging gabii didto sa Hoops Dome sa Lapu-Lapu City.

Gikan sa 20 ka buwan nga pagpahuway, gipakita ni Sonsona (15-1, 12 KOs) nga wala siya matay-i dihang gipagawas niya ang iyang abilidad aron pagsakmit sa unanimous decision nga kadaugan batok ni Jacobo (16-3, 4KOs).

Wala pa kaayo mikonekta ang duha ka boksidor dihang nagsinukdanay sila batok usag-usa sa sayung bahin sa away.

Nagsugod ang aksiyon sa third period dihang misugod pagpaigo si Sonsona og mga solidong kombinasyon sa ulo ug lawas ni Jacobo kinsa adunay di kasarangang fighting stance.

Nailhan sa iyang talagsaong footwork, ang General Santos City boxer mipaluya ni Jacobo gamit ang mga hait nga jab sa ulo.

Apan dihang nagtuo na ang kadaghanan nga sayun rang makuha ni Sonsona ang daog, kalit lang mipakita og kaagresibo si Jacobo og mipatama og mga hook sa ulo ni Sonsona.

Ang Mehikano mipadayon sa pag-presyur sa Pinoy boxer, apan nakabawi si Sonsona sa 7th round ug misumbalik og atake ni Jacobo.

Sa eight round, mipatugpa si Sonsona og bangis nga left straight nga mipahagsa ni Jacobo. Nakabangun hinuon si Jacobo, apan muna-muna na niini nga nakapanagang sa atake ni Sonsona hangtud nga natapos ang away.

Human sa 12 ka binukbukay ang iskor sa tulo ka hurado -98-91, 98-91 ug 97-92 tanan pabor ngadto ni Sonsona. “Moangkon ko medyo nabag-ohan pako gamay pero akong gisaad nga sugud karon straight na akong training aron ma-prepare ko para sa mga lig-on pang boksidor nga akong kontrahon,” matud pa ni Sonsona.

Sa iyang bahin, kontento si SGG Boxing Promotion president Sammy Gello-ani sa gipakita ni Sonsona ug gisaaran ang batan-ong boksidor nga tabangan pagkab-ot pagbalik sa damgo nga subling mahimong world champion.

“Maybe mga three to four fights pa against tough latin boxers and from there we will see if ato na ba siyang tagaan og chance pagbalik nga moaway og world title,” matud pa ni Gello-ani kinsa mipahibalo nga moaway pagbalik si Sonsona sa Disyembre dinhi sa Cebu.

Sa supporting bout, nadepensahan ni Jessie “The Terminator” Albaracin ang iyang WBO Oriental super bantamweight title pinaagi sa fifth round KO batok sa Sugbuanong si Marvin Tampus Singwancha.

Gipakatug usab ni kanhi WBO interim light flyweight titlist Johnriel “Quadro Alas” Casimero si TI Yamagata Sentillas sa second round.  - BANAT NEWS