Paloma nahimong bayani
CEBU, Philippines - Nahimong bayani si Paloma human niya mapasulod ang markang-bahala niyang three pointer sa nahabiling tres segundos sa fourth quarter aron maka-eskapo ang iyang koponan nga Felix Lauro batok sa RC Bullets, 49-48 sa Buaya Seniors Basketball Association (BSBA) Lauro's Cup 2011 didto sa ilang barangay gym sa Lapu-Lapu City.
Mao usab kadto ang puntos nga napupo ni Paloma niadtong duwaa nga maoy nakaluwas sa Felix Lauro team gikan sa kulbahinam kaayong duwa.
Si Requit mao lang ang bugtong player sa Felix Lauro team nga nakakuha og double figures pinaagi sa iyang 10 puntos.
Sila si Epe ug Abing mihipos sab og 10 puntos matag usa alang sa pilderong RC Bullets.
Sa laing duwa, sila si Pompy Ngujo ug Renato Casinillo nagkumboya og 27 aron pangulohan ang Josh Internet, kinsa milubong sa E. Crispy sa iskor nga 69-49.
Si Ngujo mipupo og 15 puntos, samtang si Casinillo miani og 12 puntos.
Ang naparot nga E. Crispy gipangulohan sab ni Carillas, kinsa mibahog og 23 puntos. (BANATSPORTS)
- Latest
- Trending
