CEBU, Philippines - Ang langyaw'ng Eskrima world champion nga si Jean Calimoutou mokuha og Advance Eskrima Course Final Examination karong adlawa didto sa Sto. Niño Village, Banilad, siyudad sa Sugbu.
Si Calimoutou, kinsa nihuman sa iyang Basic and Intermediate Courses niadtong Agosto, ubanan ni South Korean Jinho Lee, kinsa mokuha sab og pasulit sa Intermediate Course.
Natapos ni Lee ang iyang Basic Course niadtong Septiyembre. Gilauman siyang mopuyo dinhi hangtod sa Disyembre aron mokat-on pa og dugang Filipino martial arts.
Si Calimoutou maoy unang French national nga nikompleto sa tulo ka Academy courses, nga naaprobahan sa Technical Education and Skills Development Authority (TESDA). Ang matag kurso molanat og 200 ka oras ug itudlo kini sud sa usa ka bulan.
Ang Academy of Eskrima maoy bugtong martial arts school nga rehistrado ug adunay otoridad nga mohimo og Filipino martial art classes sa TESDA.
Si TESDA Head of Provincial Operations Danilo Montaña maoy magsilbeng Chief Assessor. Moabag niya mao silang Grandmasters Nick Elizar, Rodrigo Maranga, Fred Carin ug Tonying Patalinghug.
Sa laing bahin, ang mga lokal nga sila si Jonas Azarcon, Petrona Marie Lawas ug David Arwell Camus mokuha sab og Advance Course Final assessment. (BANATSPORTS)