Chris Sumalinog: Ang Agila sa Sugbu

CEBU, Philippines - Bisan   panagsa lang siya pasudlon sa miaging 74th University Athletics Association of the Philippines (UAAP), malipayon lang gihapon ug kontento na kaayo si Christopher 'Oping' Sumalinog isip usa ka role player alang sa mapasigarbuhon nga four-peat champions Ateneo de Manila University (ADMU) Blue Eagles nga nalakip na karon sa usa sa labing maayong collegiate basketball team sa Pilipinas nga midaog og   upat ka sunod-sunod nga korona.

Giharos sa Blue Eagles ang Far Eastern University (FEU) Tamaraws sa ilang "best-of-three" championship series lakip ang 82-69 nga kadaugan atol sa Game-2 niadtong Septiyembre 29 didto sa Smart-Araneta Coliseum.

Nalakip na sa elite ballclub ang Ateneo nga adunay four-peat kauban ang University of the East, University of Sto. Tomas ug ang ilang higpit nga karibal De La Salle University.

Sa ilang upat ka titulo, tulo lang ka season nga nakaduwa si Sumalinog alang sa Blue Eagles. Wala siya makaduwa sa miaging tuig tungod kay nagpaalim siya sa iyang "anterior cruciate ligament" (ACL) tear, usa ka matang sa piang sa mga players.

Kining matanga sa piang ang kanunay mahitabo sa mga sports personalities dili lang sa basketball players tungod kay mahiagum ang player niini kun kusog ang iyang pagkatugpa o sayop ang iyang pivot o pagtuyok ilabi na og masangit sa laing player ang iyang tuhod. Mao kini ang kasagarang hinungdan kun nganong sayo moretiro ang ubang players nga dugay o dili gyud maka-rekober.

Matud pa ni Sumalinog, "Coach Norman Black has a system and I had to follow what he wants because like a good soldier, he must obey the order of the General. I have no problem with my role and I don’t complain of my playing time."

Ang 22-anyos nga si Sumalinog, usa lang sa tulo ka mga anak ni kanhi University of the Visayas (UV) Green Lancer champion player Hermes Sumalinog, Sr. nga didto mogradwar sa Manila.

Ang iyang maguwang nga si Michael 'Micmic' Sumalinog varsity player sab sa UST Growling Tigers ug migradwar sa kursong Bachelor of Science in Business Administration (BSBA) ug karon usa na ka real estate broker. Ang usa niya ka maguwang nga si Hermes 'Kulot' Sumalinog Jr., kanhi NCAA player nga sakop sa Mapua Institute of Technology (MIT) Chirping Cardinals nga migradwar sa BS Psychology.

Si Chris migradwar sab sa kursong Inter-Philosophy Studies ug naglaraw sab siya pagkuha’g laing major course nga mao ang Art Management didto sa Ateneo sunod tuig diin maoy katapusan niyang season sa UAAP.

Karon nga hingpit na gyud siyang nakarekober sa iyang ACL, misaad si Sumalinog nga iyang paningkamotan og maayo nga mas daku pa siya’g matabang sa ilang team sa sunod tuig diin tinguha sa Blue Eagles nga mohimo’g UAAP record isip bugtong team nga modaog og lima ka sunod-sunod nga korona nga wala pa sukad mahitabo.

Si Sumalinog usa ka Dean’s Lister sa Ateneo.  (BANATSPORTS)