JCI Run giuswag ngadto sa Nobiyembre

CEBU, Philippines - Gumikan sa kagamay pa sa nagparehistro, ang organizers sa JCI Run naaghat pag-uswag sa lumba nga gikatakda unta karong Domingo ngadto sa Nobiyembre sa wala pay tukmang petsa diha gihapon sa Parkmall grounds.

Kini ang gipahibalo ni JCI Cebu-Mactan Channel president Eli Espina atol sa SCOOP Forum kagahapon.

"Tungod sa ka minos sa nagparehistro among i-uswag ang petsa sa dagan. Kami nangayo og dispensa sa mga nagparehistro ug mga sponsors ug nangamuyo sa pagsabot kay kini gihimo aron mahatagan og pundo ang programa sa "Read To Lead," asoy ni Espina.  

Alang niadtong nakarehistro na, mahimo na nilang makuha ang ilang singlets ug race bib didto sa Parkmall.

Padayon pa gihapon ang registration diha sa Runner Ayala, Parkmall ug Cebu City Sports Center.  (BANATSPORTS)