PAREF Springdale mopasiugda'g "Run with the Titans" karong Nobiyembre 10

CEBU, Philippines - Sa labing unang higayon, ang PAREF Springdale mopasiugda og fun run nga uloha'g "Run With The Titans" unya sa Nobiyembre 10 diha sa Parkmall sa Mandaue City.

Tungod kay mao lang kini ang bugtong lumba nga mahitabo sa maong adlaw, gilauman sa organizers nga maghugop ang mga running enthusiasts gikan sa nagkalain-laing running clubs dinhi sa Sugbu, mga ginikanan, tinun-an ug mga magtutudlo sa maong tunghaan.

Ang lumba gibahin sa unom ka kategoriya, ang 15K Open, 15K parents, 7K Open, 7K teachers, 7K parents, 3K fun run ug kiddie dash nga eksklusibo lamang sa mga tinun-an sa Springdale.

"Organizing this run is a part of schools move to show that we have a varieties of school activities to promote and aside from football, we have also a different kinds of sports to focus," matud pa ni school director Rick Ampiloquio.

Magsilbe usab kini nga charity project sa tunghaan diin ang matigom nga salapi ihatag ngadto sa Kaabag Foundation nga maoy ilang beneficiary.

Mga ganting salapi ang nagpaabot alang sa top three finishers sa 15K ug 7K categories, samtang gift check ang madawat sa mananaog sa ubang mga kategoriya.

Ang registration fee nagkantidad og P300 sa 15K, P250 sa 7K ug P200 sa 3K libre na niini ang running shirt ug snacks.

Niadtong interesadong mosalmot mahimong magpalista sa Parkmall, Center For Sight sa Cebu Doctors' University (CDU) campus, Shell gasoline station sa Lahug ug Paref Springdale campus. (BANAT NEWS)