GTK pinatalsik na sa POC

MANILA, Philippines - Hindi naantig ng pre­sen­sya ni Go Teng Kok ang mga NSA officials na dumalo sa extraordinary POC General Assembly sa Wack Wack Golf and Country Club sa Manda­lu­yong City kahapon.

Walang tumutol nang ipa-approve ni POC first vice president Manny Lopez ang resolusyong pinir­mahan ng 37 mula sa 41 NSA’s na miyembro ng POC na nagsasaad na dapat na ma-expelled si Go.

“We are in the reform mode and the only solution is to remove the thorn that is hurting the mode of reform we are undertaking. I just hope we will not do this again, it’s very hard to do something like this,” wika ni POC president Jose Co­juangco Jr. na pinangunahan ang pagpupulong na tumagal lamang ng ha­los 10 minuto.

Si Go na dating kaalya­do ni Cojuangco at itinakda pa bilang kanyang special assistant ay dumalo kasama ang abogadong si Sammy Estimo at pinapasok naman kahit deklarado na Persona Non Grata ng POC.

Pinilit ni Go ang body na bigyan siya ng pagka­kataon na idepensa ang sarili bagay na hindi pina­kinggan ng POC GA.

Nagkaroon ng iringan nang sumabat si Estimo at dinuro-duro si POC Legal Counsel Atty. Ramon Ma­linao na umalma rin sa aksyon ng bisita.

Dito pumasok si Mark Joseph at pinalabas si Estimo dahil hindi ito kasapi ng POC bagay na siyang ginawa ni Romeo Magat nang akap-akap nitong pi­na­labas ang dating opisyal ng chess.

Si Go na sumunod din sa labas ay sinunog naman ang dalang POC Constitution and By Laws dahil wala na umanong saysay ito sa aniya ay diktaturyang pamamalakad ni Cojuangco.

Nilinaw naman ni Cojuangco na hindi apektado ang PATAFA sa pangyayari pero kailangan ng aso­sasyon na humanap ng ibang magiging kinatawan sa POC dahil pinatalsik na nila si Go.

Inihayag naman ni PSC chairman Ricardo Garcia na hihintayin niya ang reko­mendasyon ng POC sa kung sino ang kakatawan sa PATAFA dahil lahat ng request na pipirmahan ni Go ay kanilang di aaksyunan.