Dragon Boat vs Kayak

CEBU, Philippines - Gikatahong giandam na sa Philippine Sports Commission (PSC) ang face-off tali sa Philippine Dragon Boat Team ug Philippine Canoe-Kayak team.

Matud pa nga pinaagi sa maong face-off mahukman kung kinsa gyud sa duha ka paksyon ang morepresentar sa nasud sa SEA Games sa Nobiyembre didto sa Indonesia .

Sonsona moaway sa Hoopsdome

Nahikyad na ang comeback fight ni kanhi WBO super flyweight champion “Marvelous” Marvin Sonsona kinsa moaway sa usa ka ten rounder bout batok ni Mexican Leopoldo Gonzalez sa Septiyembre didto sa Hoopsdome sa Lapu-lapu City .

Kini ang subling pagbalik ni Sonsona (14-1-1, 12KOs) human sa kapin usa ka tuig niya nga pagkawala sa eksena sa boksing. (LPM)

Agbeko misyagit og tikas

Namantsahan og kontrobersiya ang kadaugan ni Mexican Abner Mares batok ni African Joseph Agbeko kinsa miangal nga gitikasan siya sa referee nga si Russell Mora nga iyang gipasanginlang mipabor sa iyang kaatbang.

Si Mares midaog via majority decision aron mailog ang IBF bantamweight title ni Agbeko, apan ang nauwahi plano nga mopadangat og protesta alang sa rematch sa labing daling panahon. (LPM)

Donaire sayo moaway

Giusab ngadto sa mas sayung petsa ang giatangang comeback fight ni WBO/WBC bantamweight champion Nonito "The Filipino Flash" Donaire Jr. batok sa wala pa mailhing kontra didto sa Estados Unidos.

Gikan sa Nobiyembre 5, si Top Rank Inc. bigboss Bob Arum nakahukom nga ipahigayun ang away sa Oktubre 22 aron likayan ang pakigdungan sa maong away sa laing blockbuster title fight ni super middleweight Lucian Bute.

"We knew about the Showtime date for Bute a long time ago, and we didn't think it was appropriate to promote and put on a fight on HBO against Showtime on the same date,” matud pa ni Arum. "So we asked HBO if it would be possible to move Donaire's fight to October 22, and they said yes."

Gipahibalo usab ni Arum nga may duha ka venue na ang iyang gipilian diin mahitabo ang comeback fight sa Pinoy boxing superstar nga mao ang Home Depot Center sa California o didto sa usa ka Hotel Casino sa Reno , Nevada.

Kabahin sa kung kinsa ang atubangon ni Donaire, si Arum mibutyag nga lakip sa mga gipilian mao ang mga bantamweight prospects sama nila ni Juan Mercedes, Sebastian Gauthier, Christian Esquivel ug Tshifhiwa Munyai.

Wala hinuoy supak si Donaire sa kausaban sa petsa sa iyang away tungod kay haom ra usab kini alang sa ilang preparasyon sa iyang kapikas nga si Rachel sa ilang church wedding nga gitakda sa Nobiyembre 11. (LPM gikan sa wires)(BANAT NEWS)