Harry Radaza team nakalingkawas

CEBU, Philippines -  Nakalingkawas gikan sa usa ka makutas nga duwa ang team Harry Radaza pinaagi sa free throws ni Mario Bancale sa himalatyong oras sa final period aron mokulit og kulbahinam nga kadaugan batok sa Rulls Bakeshop, 81-80 sa LLBA Rollway Customs Brokerage Cup 2011 basketball tournament didto sa Villas Magallanes gym, dakbayan sa Lapu-Lapu.

Ang team Harry Radaza nga gipanag-iya ni Lapu-Lapu City councilor Harry Radaza naghangad sa solidong kombinasyon nilang Bucio Ompad ug Bancale nga mihimo'g double figures ug maoy nakaguba sa duwa sa Rulls Bakeshop. Si Ompad mipupo og 19 aron pangulohan ang Harry Radaza, samtang si Bancale miani og 12 puntos. Laing tulo nila ka teammates ang mikandos sab og double figures.

Ang Rulls Bakeshop ni team owner Rupert Canizar, gipangulohan ni Noli Paquibot sa iyang 26 puntos, gisundan ni Allan Sepe nga adunay 22 puntos.

Sa pasiunang duwa, ang Solmeat ni team owner Leo Bascon mihaon sab og daog batok sa Igot Trucking ni Junax Igot.

Daku og natabang ang pagduwa ni kanhi Cebu Central Colleges (CCC) nga karon University of Cebu (UC) nga si Jack 'Jacksol' Soler uban sa Solmeat nga misansan og 11 puntos, apan si Jonathan Lazarraga maoy nangu sa kadaugan nga mikandos og 16 puntos, samtang si Diego Tampus mihapos og 14 puntos.

Si Jimboy Igot, kinsa miarangkada og 13 puntos mao sab ang topscorer sa naparot nga Igot Trucking ug si Pinote milabyog og 10 puntos.

Puntos Matag Usa

Unang duwa:

SOLMEAT (57) - Lazarraga 16, Tampus 14, Jacksol 11, Oneil 8, Bascon 4, Miranda 2, Maeil 2

IGOT TRUCKING (51) - Jim. Igot 13, Pinote 10, Pardillo 7, Intud 5, Aballe 4, Jon. Igot 4, Padilla 3, Ouano 2, Bardago 1

Ikaduhang duwa:

HARRY RADAZA (81) - Ompad 19, Acuña 12, Bancale 12, Soronio 10, Rosal 10, Cordero 7, Decembrano 4, Sha 3, Aparri 2, Sagarino 2

RULLS BAKESHOP (80) - Paquibot 26, Sepe 22, Perez 18, Llenes 4, Dococo 3, Galiarte 2, Lapoja 2, Bungo 2, Pedrano 1 (BANAT NEWS)