California, Alcords midaog

CEBU, Philippines - Nidaog ang team California ni playing coach Rodi Cabigas batok sa Vintage, 81-71, samtang nakaipsot ang Alcords ni skipper Marlon 'El Presidente' Reyes batok sa Beer Gins ni Flor Yosores, 78-72 niadtong Huwebes sa gabii sa 2nd round sa 2011 Vintage Basketball Club (VBC) basketball tournament didto sa barangay Pooc Sports Complex, dakbayan sa Talisay.

Gumikan sa ilang kadaugan, ang California ug Alcords pareho karong nagbitbit og 3-1 nga baraha.

Nakauna unta ang Vintage sa first period diin milabaw kini, 21-14 sa mga paningkamot nilang Julius Guba ug Billy Cañedo, apan dali kaayong misukli og mga puntos ang California sa pagpangulo nilang Jun Guba ug Roy aron pahakan ang labaw,   40-42 sa halftime.

Wala magdugay, ang California milusad og 22-10 scoring run sa third period pinangulohan ni Cabigas, kinsa nakakuha sab og suporta gikan nilang Mar Torres ug Scottie Tata Cabañero aron masakmit ang liderato, 62-52 sa final period ug gikan niadto wala na kini molingi pa.

Sa laing bahin, si Cesar Alcordo maoy nangu sa Alcords pinaagi sa iyang 14 puntos samtang sila si Marlon Reyes ug Ricboy Nacario nagkumboya og 26 puntos.

Si Flor Yosores mao sab ang nangu sa pilderong Beer Gins sa iyang 16 puntos, gisundan ni Jonas Lastimosa nga adunay 15 puntos. (BANATSPORTS)