12 ka boksidor daog sa puntos

CEBU, Philippines - Napulo’g duha ka mga amateur boxers ang midaog batok sa ilang tagsa-tagsa ka kaatbang pinaagi sa puntos ug bugtong usa ka sangka ang gipahunong sa referee dihang girapido ni Ian Refuella sa Cebu City Sports Commission ang iyang kontra nga si Michael Sembrano sa Phil-Aust Boxing Club ubos sa 51 kilograms atol sa gipahigayon nga 1st ABAP Cebu/ Mayor’s Cup Amateur Boxing Dual Meet Tournament kaniadtong Sabado sa hapon didto sa Plaza Sugbo atubangan sa Cebu City Hall.

Ang bugtong katuyoan sa ABAP boxing nga himoon kaduha matag buwan mao ang pagdiskubre og mga banggi-itang boksidor nga maoy makahatag sa Pilipinas sa labing unang gold medal sa Olympics.

Sa labing unang sangka sulod sa 13 ka paresan, midaog si Raymund Tarona sa Phil-Aust Boxing Club pinaagi sa puntos sulod sa tulo ka rounds batok ni John Andro sa Flores Boxing Club ubos sa 30 kilograms.

Laing midaog pinaagi sa puntos mao sila si Richard Rama sa Phil-Aust Boxing Club batok kang Marvin Pumar sa Sta. Cruz Stable ubos gihapon sa 30 kilograms weight category, Rommel Tunacao sa UV- Mandaue batok kang Kitseron Garces sa Sta. Cruz Stable ubos sa 36 kilograms division, Marco Pumar sa Sta. Cruz Stable batok kang Rhezon Tarona sa Phil-Aust Boxing Club sa 36 kilograms, Jeffrey Estela sa Phil-Aust Boxing Club batok kang John Ybanez sa Flores Boxing Club ubos sa 38 kilograms category, Margarito Moya sa Sanai Boxing Club batok kang Lester Dula sa Sta. Cruz Stable ubos sa 45 kilograms weight class, Anthony Coral sa Team Cebu City batok kang Edu Rosal sa Phil-Aust Boxing Club ubos sa 50 kilograms, Steven Noblefranca sa Talisay City batok kang Reoxyl Tabogon sa Team Cebu City ubos gihapon sa 50 kilograms.

Didto mahitabo ang RSC o referee stopped contest nga sangka sa ika-siyam nga paresan dihang gikulata ni Refuella sa Team Cebu City si Sembrano sa Phil-Aust Boxing Club ubos sa 51 kilograms.

Sa lain pang mga sangka kaniadtong Sabado, midaog sab silang Jared Jalil Payao sa Omega Boxing Club batok kang Zoro Babel Alsola sa Team Cebu City ubos sa 58 kilograms, Raymund Empic sa Team Cebu City gihapon batok kang Clifford Loreto sa Omega Boxing Stable ubos sa 54 kilograms, Charlie Pucdol sa Omega Boxing Club batok kang Warren Labusta sa Phil-Aust Boxing Club ubos sa 57 kilograms ug sa kataposang sangka niadtong adlawa, midaog si Edu Serrano sa Omega Boxing Club batok kang Ramjess Colina sa Team Cebu City ubos lang gihapon sa 57 kilograms, ang pinakabug-at nga timbang sa maong kumpetisyon.

Ang official nga resulta sa nahisgotang dual meet gipadala sa BANAT Sports ni Felman Gingoyon, usa ka sakop sa ABAP-Cebu Chapter ubos sa bag-ong natudlong presidente nga si Lorenzo “Chao” Sy kinsa commissioner sab sa CCSC pinaagi sa pagpaluyo ni Cebu City Mayor Michael L. Rama.

Ang sunod nga kumpetisyon adto ipahigayon sa barangay Guadalupe unya sa umaabot Hulyo 9. (BANAT NEWS)