Maroon, Green naka-una sa series

CEBU, Philippines - Naka-una ang Maroon ug Green teams batok sa tagsa-tagsa nila nga kaatbang sa Game-1 sa 2011 LLBA-Rollway All-Star Games best-of-three series niadtong Biyernes sa gabii didto sa Villas Magallanes gym, dakbayan sa Lapu-Lapu.

Ang Maroon nidaog batok sa Orange, 100-94 sa 40-above division, midaog sab ang Green batok sa Gray sa iskor nga 99-91 sa 35-junior.

Ang Maroon nagsalig sa kombinasyon nilang Pompee Ngujo ug Lito Magat nga nagkumboya og 45 puntos. Si Ngujo mipupo og 23 puntos, samtang si Magat miani og 22 puntos. Mirehistro sab og double figures sila si Alan Yu ug Eddie Bontes sa ilang 14 ug 10 puntos matag usa.

Nangu sa pilderong Orange mao si Jun Medina pinaagi sa iyang 18 puntos, gisundan nilang Allan Sepe ug Roger Ompad nga parehong mitimbre og 14 puntos.

Pareho sab nga mitimang og 13 puntos sila si Arman Lamoste ug Ernie Giganto alang sa Orange.

Sa laing bahin, gipangulohan ni Cordero ang Green pinaagi sa pag-ugbok og 17 puntos. Si Jerome Plarisan misansan og 16 puntos, sila si Ricky Wagwag, Mark Lucas, Neil Burlaos ug Bosyo Ompad mihipos sab og double figures sa maong kadaugan.

Nakawang lang ang 26 puntos nga nahimo ni Uriel Manilag kay kulang siya'g suporta gikan sa iyang kaubanan.

Mipabuhagay unta og 26 puntos si Manilag, apan duha lang sa iyang kauban ang mi-iskor og double figures. Si Jonathan Tojeno miposa og 13 puntos ug si Bulldog Ybañez mitira og 12 puntos.

Ang All-Star Game gipaluyohan sab ni Rolly dela Pieza ug sa JB Sportswear.

PUNTOS MATAG USA

Unang duwa:

MAROON (100) - Ngujo 23, Magat 22, Yu 14, Bontes 10, Tampus 9, Ceniza 6, Ouano 5, Bascon 4, Tariman 4, Paradillo 3

ORANGE (94) - Medina 18, Sepe 14, Ompad 14, Lamoste 13, Giganto 13, Palad 6, Brañanola 5, Villarino 5, R. Dela Pieza 4, Malingin 2

Ikaduhang duwa:

GREEN (99) - Cordero 17, Plarisan 16, Wagwag 12, Lucas 11, Burlaos 11, Ompad 10, Taghoy 8, Bentazal 8, Igot 4, Aying 2

GRAY (91) - Manilag 26, Tojeno 13, Ybañez 12, Aying 8, Rukawa 6, Sevilla 6, Pangatungan 6, Dela Rama 5, Lazaraga 5, Bancale 4 - BANAT NEWS