Kenneth Kernn Sesante "cum laude" sa University of Cebu

CEBU, Philippines - Dili lang maayo sa basketbol si Kenneth Kernn Sesante, ang kanhi pointguard sa University of Cebu (UC) Webmasters, apan lakip na usab sa academic dihang migradwar siya nga usa ka Cum Laude ug class salutatorian sa UC Law niadtong Marso 18 didto sa Cebu International Convention Center (CICC).

Kahinumduman, si Sesante nga maoy nangu sa Webmasters ngadto sa 2005 finals sa Cebu Schools Athletic Foundation, Inc. (CESAFI) batok sa University of the Visayas (UV) Green Lancers, second placer sab sa Customs Brokers Licensure Exam sa susama gihapon nga tuig kanus-a siya migradwar sa maong kurso.

Siya maoy giilang usa sa labing malampusong varsity player sa UC tungod kay dili tiaw ang pagbahin sa oras isip usa ka player ug usa sab ka estudyante ilabi na sa iyang gipakitang abilidad gawas sa basketball court.

Matud pa ni Sesante nga mikuha siya’g kursong abogasiya o Law tungod sa tulo ka rason. Una, iyang gitan-aw ang abogasiya nga usa ka halangdon ug inilang kurso,   ihaduhang rason tungod kay may kalabotan kini sa iyang negosyo isip Customs Broker ug   ikatulo gusto niyang sundon ang lakang sa mipanaw na niyang amahan si Atty. Napoleon M. Sesante, usa ka retired police colonel.

Sumala pa ni Sesante, tumang sakripisyo ug pag-ampo ang iyang gigahin aron   molampos isip kanhi varsity player ug usa ka estudyante aron makab-ot ang iyang mga damgo.

Mapasalamaton si Sesante ngadto ni UC President Atty. Augusto W. Go, kinsa maoy naghatag kaniya'g higayon nga makatungha sa maong unibersidad. Nagpasalamat sab siya ngadto sa dean sa College of Law nga si Atty. Baldomero C. Estenzo nga maoy naggiya kaniya ngadto sa matarong nga dalan isip usa ka maayong atleta ug usa ka sulundon nga estudyante.  (BANATSPORTS)