Blue pabiling naghupot sa liderato, 5-0

CEBU, Philippines - Gipahugtan sa Blue Team-Bureau of Jail Management and Penology (BJMP) regional office ang ilang liderato human sila maka-eskapo batok sa mas batan-ong Red-Cebu City Jail Crusaders sa iskor 79-76 nga nag-agi una og singko minutos nga overtime alang sa ilang ikalimang sagunson nga daog sa nagpadayong BJMP-7 Sportsfest Inter-Color basketball tournament didto sa barangay Kalunasan covered court.

Sa sayo pa, midaog ang Yellow-Cebu South all stars batok sa Black-Mandaue BJMP, 90-64 alang sab sa ilang ikalimang daog uban sa usa ka pilde ug nahimutang sa ikaduhang pwesto.

Kanunay sikit ang duwa tali sa Blue ug Red ug nagtabla pa kini sa 58 sa pagkatapos sa third period ug nagtabla pag-usab sa 71 atol sa regulation.

Hinoon, gipakita sa Blue nga mas gusto silang modaog ug wala sila molugak sa ilang depensa hangtod naselyado na nila ang kadaogan pinaagi sa ilang 8-5 nga scoring edge sa overtime nga nahimong posible tungod kanilang Joel Bantaya ug Norven Cuyno.

Sila si Louie Fajardo ug Bantaya maoy nangu sa opensa sa Blue pinaagi sa ilang 23 puntos matag usa samtang si Cuyno midugang og 15 puntos.

Ang napildeng Red Team gipangulohan nilang Kyle Andaya ug Bart Reasul kinsa miposa og 27 ug 19 puntos matag usa ug si Lito Tarona miamot og 13 puntos. Ang Red naghupot na karon og 3-3 nga baraha.

Sa laing bahin, si Ramil Emboris maoy nangu sa Yellow sa iyang 21 puntos ug si Roland Alcomendras midugang og 17 puntos.

Ang 3-3 nga Black gipangulohan ni Felix del Castillo sa iyang 21 puntos.

Puntos matag usa:

First Game:

Yellow (90)— Emboris 21, Alcomendras 17, Yuson 15, Ellado 11, Olid 8, Jumawan 6, Rivera 4, Unabia 4, Torredes 2, Remeticado 2

Black (64)— Del Castillo 21, Lodovuico 12, Echague 12, Templado 6, Relucia 5, Cobol 4, Villalon 4

Second Game:

Blue (79)— Fajardo 23, Bantaya 23, Cuyno 15, Gutual 7, Miot 5, Batong 2, Dalumpines 2, Nemeño 2, Tingcang 2

Red (76)— Andaya 27, Reasul 19, Tarona 13, Gerona 6, Dela Peña 4, Plaza 3, Aliño 2,Macabando 2.  - BANAT NEWS