CEBU, Philippines - Maghugop na sab ang mga tennis player dinhi sa Sugbu sa ipahigayong 1st DRB Men's Tennis Open nga mosikad karong Sabado diha sa Alta Vista Golf and Country Club ug sa Pardo Tennis Club tennis courts.
Ang walo ka adlaw nga torneyo magsilbeng tune-up match alang sa National Collegiate Games didto sa Manila sunod bulan ug sa Palarong Pambansa karong summer.
Ang unang-duha ka hugna nga aksiyon himuon sa Alta Vista Golf and Country Club, samtang ang semifinals ug ang championships duwaon sa Pardo Tennis Club tennis courts.
Ang kampiyon makadawat og P10,000, samtang ang runner-up mobulsa og P5,000.
Ang semifinals ug quarterfinalist makaangkon og P2,500 ug P1,500 matag usa.
Si DRB sports director Cathy Elizondo ug ang PHILTA accredited referee alang sa Visayas nga si Fritz Tabura mipahibalo nga ang torneyo gilaumang salmotan sa mga lokal nga talento dinhi sa Sugbu ug silingang mga probinsiya.
Ang deadline pagduso sa mga entries kutob lang karong adlawa. Niadtong interesado, mahimong mokontak ni Fritz Tabura 0916-6485039 ug Cathy Elizondo sa 09297878053. – BANAT NEWS