Poblacion Oriental hawod sa Inter-barangay

CEBU, Philippines - Gipakgang sa Poblacion Oriental ang mapintas nga ataki sa Pulpogan aron moposte'g 88-79 nga kadaugan ug aron usab langkaton ang titulo sa Inter-barangay division sa 1st Mayor Teresa P. Alegado Cup Fiesta Basketball League didto sa Consolacion Sports Complex.

Ang duha ka kampo parehong mipakita sa ilang kalidad sa duwa nga miresulta sa panagtabla, 26-all paghuman sa unang 10 minutos sa kumbati, apan ang Pulpogan miarangkada sa ikaduhang kuwarter aron moposte'g 59-52 nga bentaha sa halftime.

Bisan pa niana, ang Poblacion Oriental ni coach Shorneil Patalinghug mitusik sa third period ug mipatuman sa ilang full-court trapping defense ug ilang gilupig sa pinuntosay ang Pulpogan, 22-10 aron pagbaton og singko puntos nga labaw, 74-69 paingon sa final period.

Mihulga ang Pulpogan sa nanghinapos nga bahin sa duwa, apan sa wala damha, kalit nga nanginit si Daryll Medida, kinsa miposa og duha ka sunod-sunod nga triples ug unya gisundan sa iyang breakaway lay-up human makakawat og bola aron malayo ang Poblacion Oriental gikan sa delikadong sitwasyon.

Si Jerome Valle miposa og 15 puntos, samtang ang managsuong Louie ug Elbert Malagar mitampo og 12 puntos matag usa alang sa Poblacion Oriental nga mibulsa og P25,000 isip ganti sa ilang kadaugan.

Sila si Jervy Ermac ug Ronald Somosot nagkumboya'g 31 puntos alang sa Pulpogan nga miangkon og P15,000. Ang Brgy. Nangka nakakuha og P10,000 bugti sa ilang pagpahiluna sa ikatulo nga dapit.

Ang usa ka bulan nga torneyo nahimong posible pinaagi sa walay puas nga suporta sa Consolacion municipal council ubos sa liderato ni Mayor Teresa P. Alegado ug Vice Mayor Rey Damole.

Gipaluyohan sab kini ni executive committee chairman Julius Alegado, sports director Engr. Nilo Ferraren, Nicol Villo, Alfie Ouano, Bea Ermac, Brando Cuizon, Analee Gungob, Hon. Ali, ABC president Gelio Maquilan, SKF chairperson Madel Herrera, league commission Paul Alelu Q. Flores ug technical head Aurelio Eslawan. (BANATSPORTS)