Duna gyu'y matumba

CEBU, Philippines - Miabot na gyud ang panahon nga makapahungaw sa ilang kaligutgot sila si AJ 'Bazooka' Banal sa ALA Boxing Gym ug Nicaraguan Luis 'El Demoledor' Perez sa tagsa-tagsa nga magsangka sa main event sa "Pinoy Pride" boxing card karong gabii diha sa Waterfront Cebu City Hotel and Casino.

Bisan pa man sa weigh-in kagahapon didto sa Atrium sa SM City-Cebu, nakita na sa dagway nila ni Banal ug Perez ang kahinam nga mopatugpa og kinumo batok sa usa'g-usa.

Atubangan sa mga katawhan nga misaksi sa official weigh-in, nagbinaharay ang duha ka mga boksidor, apan misamot kahugyaw ang mga Cebuano boxing fans human misenyas si Banal og gilit sa iyang liog timaan sa paghagit niya ngadtong Perez.

Si Banal (21-1-1, 17KOs) mikuha sa weight limit nga 120 lbs., samtang ang former two-division world champion nga si Perez (26-4, 17KOs) nga mas daku pa ni Banal, mitimbang og 117 lbs.

Hinuon, daan nang namahayag ang manager ni Perez nga si Mario Antonio Garcia Fonseca nga mokatkat susama sa usa ka lightweight (135 lbs.) si Perez.

Sa supporting bout, kompiyansa kaayong mitungtong sa timbangan si Mark Jason Melligen (19-2, 1 KO) ug mitimbang kini'g 151 lbs., sukwahi ni Mexican knockout artist   Bladimir Hernandez (18-3, 16KO’s) nga milapas og duha ka libras sa catchweight nga 155 lbs.  

Gihatagan una og duha ka oras aron magpasingot si Hernandez sa wala pa niya makuha ang 153 lbs. nga timbang.

Tungod niini misamot kadaku ang pagtuo ni Melligen nga tumbahon niya ang Mehikano sud sa lima ka rounds.

Nakakuha sab og saktong timbang ang mga boksidor sa undercard bout. Si ALA young prospect Jason Pagara (23-1, 11KOs) mitimbang og 138 lbs. labaw og tulo ka libras sa iyang kaatbang nga si Sapapetch Sor Sakaorat (20-6, 11KOs) sa Thailand. Ang super flyweight nga si Larry 'Bon Jovi' Canillas (15-2, 12KOs) mitimbang og 122 lbs., samtang ang iyang kaatbang nga si Ramie Laput (38-4, 17KOs) mitimbang nga 120 lbs.