Honda One Make Race sa Kartzone

CEBU, Philippines - Turno na sab sa mga Bisaya aron ipakita ang ilang katakus ug kaandam alang sa national series sa ipahigayong Visayas leg sa 2010 Honda One Make Race Dealer’s Cup ugma diha sa Kartzone sa Panagdait, Brgy. Mabolo, ning siyudad.

 Si event organizer Jonathan Uy nagkanayon nga dinhi na makita kun kinsa ang mga riders gikan sa Kabisay-an ang ilang dad-on alang sa national finals karong Nobiyembre 14 didto sa Carmona, Cavite.

Kapin sa 100 riders ug 10 ka koponan gikan sa mga dealers dinhi sa Sugbu ang gilaumang mosalmot sa torneyo.

Lima ka kategoriya ang pilian nga tigian sa riders, kini naglakip sa novice open 4-stroke, novice open 130cc., Honda beat scooters 160cc., 100-125 mixed super beginners stock ug HPI/Dealer/Club race novice open.

"Cebuanos have a great chances of making and winning in the nationals, they have a great experience and praktisado sad," matud pa ni Jonathan Uy atol sa press conference kagahapon diha sa Kartzone.

Sila si Keken Cabahug, JR Cañeda, Mark Capoy, Mario Borbon ug Lyndon Requilme maoy pipila ka top riders nga giatngang maghari sa torneyo.

Mga ganting salapi ug medalya ang nagpaabot sa mga top performers sa matag dibisyon. – BANAT NEWS