Mandaue gisubha'g daog

CEBU, Philippines - Gisubhan og daog ang Team Mandaue sa ilang unang duwa human nila gibuntog ang UV-EXMEN sa overtime, 81-76 sa Open division sa 2010 Talisay City Mayor's Cup basketball tournament didto sa Talisay Sports Complex.

 Ang Team Mandaue nga sayong natagak sa elimination round sa Tournament of the Philippines (TOP) nagbangis sa second half diin mipatuman sila sa ilang 10-2 rally nga alang sa 39-31 nga labaw sa nahabiling 5:23 sa second period.

Hinuon, wala magpabiya ang mga kanhi bitoon sa multi-titled UV Green Lancers nga sila si Jeyzzar Esperat ug Ronald Bucao nga mihimo sa ilang mga fastbreak plays aron mapahakan ang labaw, 58-63 sa 7:24 sa final period.

Misamot kaagresibo ang UV ug milusad sa ilang init nga atake, apan nakuha sa Mandaue ang dos puntos nga labaw, 72-70, sa nahabiling 45 segundos human sa break-away lay-up ni Jet Latonio.

Naglawig na unta ngadto sa kadaugan ang Mandaue, apan si Esperat nakakita'g gamay'ng buslot ug mipasulod sa iyang jumper sa katapusang singko segundos aron tablahon ang iskor, 72-all nga maoy mihatod sa duwa ngadto sa overtime.

Sa overtime, daw nahutdan na sa hangin ang UV-EXMEN nga maoy nakahatag sa Mandaue sa pabor aron molusad og 8-3 run.

Ang duha ka free throws ni Rino Berame maoy miselyado sa daog sa Mandaue. 

Sa laing duwa, ang Lawaan I naka-eskapo dala ang 79-78 nga kadaugan batok sa   Pooc, aron masakmit ang una nilang daog sa Inter-barangay seniors division

Puntos Matag Usa

Seniors Division

Lawaan (79) - Marilao 23, Carilla 17, Largo 10, Bacatan 8, Cabatas 6, Milla 4, Dablo 4, Obeso 2, Maspequiña 2, Baraga 2, Canaces 1

Pooc (78) - Manreal 22, Batoon 16, Hiñega 11, Bunotan 7, Kong 7, Balorio, 6, Barcelona 4, Nebria 3, Rico 2

Open Division

Mandaue (81) - Latonio 21, Berame 14, Espina 13, Abadia 12, Demape 6, Laygo 6, Butel 4, Garcia 2, Caputolan 2, Inoc 1

UV EXMEN (76) - Esperat 16, Bucao 12, Dela Peña 12, Violango 10, Diputado 8, Manigque 6, Delim 4, Arong 2, Wagwag 2, Abelong 2, Mosqueda 2. – BANAT NEWS