RP may pag-asa kay Leviste sa gold sa Asiad
MANILA, Philippines - May aasahan ang Pilipinas kay Toni Leviste kung pag-ani ng medalya sa Asian Games ang pag-uusapan.
Kinumpleto ni Leviste ang magandang ipinakita sa Malaysia nang kunin ang kampeonato sa Dressage Champions League na bahagi ng 2010 Merdeka Masters na ginanap kamakailan sa 3Q Equestrian Center sa Kwang, Malaysia.
Bihasa sa paglahok sa mga show jumping events, naipakita ni Leviste na puwede rin siyang kuminang sa dressage lalo na kung mahusay din ang kabayong sakay nang hiyain ang 2006 Dressage silver medalist Qabil Ambak para sa pangunguna sa torneo.
Itinambal kay FAB na isang 16-anyos Dutch bred na kabayo na pag-aari ni Carissa Coscolluela at nahirang din bilang grand prix dressage horse, nakalikom ang pambato ng bansa ng 66.75% upang talunin si Ambak na mayroong 65.34%.
Ang panalong ito ni Leviste ay nangyari matapos kunin ang pangunguna sa Malaysian Open show jumping competition sa tulong naman ng kanyang 19-anyos Swedish Warmblood mare Globe Platinum Just Jewels.
Pero ang nasabing kabayo ay nagkaroon ng tendon injury dahilan upang iretiro na ito ni Leviste sa paglahok pero nakasali pa siya sa dressage event dala ng kabayo ni Coscolleula.
Ang tagumpay na ito ni Leviste ay maituturing na magandang pangitain sa Asian Games sa Guangzhou, China sa Nobyembre lalo nga’t ang Sydney Olympian ay kabilang sa mga naitala bilang posibleng kalahon ng Equestrian Association of the Philippines (EAP) sa pamumuno ni Jose Cojuangco Jr.
- Latest
- Trending
