CDU-CDAA Run gitakda karong Hulyo 18

CEBU, Philippines - Tungod sa positibong resulta sa unang hugna sa ilang lumba, ang Cebu Doctor's University-College of Dentistry Alumni Association naglaraw sa pagpasiugda sa ikaduhang edisyon sa CDU Alumni Run karong Hulyo 18 diha sa CDU campus sa north reclamation area sa dakbayan sa Mandaue.

Mao kini ang ikaduhang higayon ning tuiga nga ang mga dentists mipasiugda sa maong matang sa kalihukan. Ang una nga gipasiugdahan sa laing grupo niadtong bulan sa Pebrero.

Liboan ka runners ang gilaumang moapil sa lumba nga magsilbeng culminating activity sa CDU's Batch '85 silver jubilee celebration.

Si batch president Oliver Seno nagkanayon atol sa press conference kagahapon nga ang laing kalihukan nga ilang nahan-ay naglakip sa mass, medical-dental mission ngadto sa adopted barangays sa CDU ug ang ilang grand alumni homecoming.

Ang CDU Alumni Run naglatid sa 10K, 5K ug 3K divisions. Ang 10 ug 5K gibahin ngadto sa duha ka dibisyon -- men ug women's class, samtang ang 3K buksan sa tanang fun runners ug alumni.

Ang kampiyon sa men ug women's 10K makadawat og P3,000 matag usa, samtang ang second ug third placers parehong modawat og P2,000 ug P1,000. Ang top three finishers sa 5K mobulsa og P2,000, P1,500 ug P1,000.

Ang tanang top three sa 10K ug 5K run makadawat sab og mga medalya ug sapatos gikan sa usa ka event sponsors nga mao ang Transformer, samtang ang fourth ug fifth makadawat og certificate ug ingon man sapatos.

Sugdan ang registration   karong Lunes diha sa Center For Sight ug SAPPRO's office nga pulos nahimutang sa Cebu Doctors' University Hospital ug sa Nike Athletic Club sa Banilad Town Center.

Ang entry fee nagkantidad og P250 niadtong mga entrante nga magparehistro hangtod sa Hulyo 12, samtang ang late registrants mobayad na og P300.

Matud pa ni CDU-CDAA president Dr. Nonito Narvasa, nga ang proceeds sa kalihukan adto mapunta sa CDU-CDAA ug sa Run For Sight Foundation. – BANAT NEWS